BAKI, VOA, Nailə Babazadə
Beynəlxalq Atom Enerjisi Agentliyinin (MAQATE) rəhbəri Rafael Mariano Qrossi Moskvada Rusiyanın "Rosatom" Dövlət Nüvə Enerjisi Korporasiyasının baş direktoru Aleksey Lixaçov ilə keçirdiyi birgə mətbuat konfransında Yaxın Şərqdəki gərginliyin nüvə təhlükəsizliyinə təsirləri barədə xəbərdarlıq edib.
VOA xəbər verir ki, Qrossi regiondakı nüvə obyektlərinin hazırkı durumunu "son dərəce həssas" kimi qiymətləndirərək, nüvə faktorunun ön plana çıxdığı yeni bir münaqişə dalğasının şahidi olduqlarını bildirib. O, hazırda sülh və müharibə arasında "incə bir xətt" üzərində yeridiklərinə işarə edərək, hərbi əməliyyatların mümkün qədər tez başa çatmasının və danışıqlar masasına qayıtmağın zəruriliyini vurğulayıb.
Görüşdə həmçinin Zaporojye Nüvə Elektrik Stansiyasındakı (NES) mövcud vəziyyət də müzakirə olunub. "Rosatom" rəhbəri Aleksey Lixaçov müəyyən şərtlər daxilində Ukrayna da daxil olmaqla müxtəlif tərəflərə elektrik enerjisi tədarükünün mümkünlüyünü qeyd edib. Stansiyanın yüksək səviyyədə enerji istehsal etdiyini bildirən Lixaçov, bu enerjidən təkcə ənənəvi marşrutlar üçün deyil, həm də məlumat emalı mərkəzlərinin qurulması kimi texnoloji layihələrdə istifadə edilə biləcəyini deyib. O, bu istiqamətdə hətta ABŞ-ın da potensial tərəfdaşlar arasında yer ala biləcəyini diqqətə çatdırıb.
İranın nüvə proqramı ətrafında yaranan iddialara da toxunan Lixaçov, rəsmi Tehranın nüvə silahı hazırlamasına dair heç bir sübut görmədiklərini bəyan edib. O, nə rəsmi hesabatlarda, nə də qeyri-rəsmi müşahidələrdə İranın hərbi təyinatlı nüvə fəaliyyəti ilə məşğul olması barədə məlumata rast gəlmədiklərini vurğulayıb. Bu açıqlama ABŞ və İsrailin İrana qarşı başlatdığı hərbi əməliyyatların "nüvə təhlükəsi" bəhanəsi ilə aparıldığı bir vaxtda beynəlxalq müstəvidə mühüm rezonans doğurub.
