BAKI,VOA, Nailə Babazadə
ABŞ-ın demokrat senatoru Kris Mörfi ölkəsinin Yaxın Şərqdə İrana qarşı apardığı hərbi əməliyyatlara sərt reaksiya verərək, Vaşinqtonun strateji məğlubiyyətə uğradığını bəyan edib.
VOA xəbər verir ki,senator Prezident Donald Trampın Ağ Evdəki "Xalqa müraciət" nitqini tənqid edərək, dövlət başçısının təsvir etdiyi vəziyyətin reallıqla üst-üstə düşmədiyini bildirib. Mörfi vurğulayıb ki, ABŞ-ın İrana qarşı hücumları gözlənilən nəticəni vermir: "Biz bu müharibəni uduzuruq".
Senatorun sözlərinə görə, ABŞ-ın İranın bütün raket, pilotsuz uçuş aparatları və nüvə proqramlarını tamamilə məhv etmək imkanı yoxdur. O qeyd edib ki, İran Hörmüz boğazını daimi nəzarətə götürərsə, regionda müharibədən əvvəlki dövrlə müqayisədə daha böyük güc nümayiş etdirəcək. "Biz sahib olmadığımız milyardlarla dolları xərcləyirik, dünyanı qeyri-sabitləşdiririk və bizi bacarıqsız göstərən bir müharibədə amerikalıların həyatını itiririk," — deyə Mörfi əlavə edib. O, həmçinin İsrailin ABŞ-a nə vaxt müharibə edəcəyini diktə etməsini qəbulolunmaz adlandırıb.
Digər tərəfdən, Pentaqonun müharibədəki hərbi itkilərlə bağlı real rəqəmləri ictimaiyyətdən gizlətdiyi iddia olunur. "The Intercept" araşdırmaçı jurnalistika platformasının məlumatına görə, ABŞ Mərkəzi Komandanlığı (CENTCOM) ölənlər və yaralananlar barədə güncəl olmayan və aşağı rəqəmlər paylaşır. Məsələn, rəsmi məlumatda "Epic Fury" əməliyyatı başlayandan bəri 303 ABŞ əsgərinin yaralandığı bildirilsə də, martın 27-də Səudiyyə Ərəbistanındakı şahzadə Sultan aviabazasına edilən hücumdakı itkilərin bu siyahıya daxil edilmədiyi irəli sürülür.
Adı açıqlanmayan bir Pentaqon rəsmisi Müdafiə Nazirliyinin məlumatları bilərəkdən əskik əks etdirdiyini və bu vəziyyətin Müdafiə naziri Pit Heqset ilə Ağ Ev tərəfindən ört-basdır edildiyini iddia edib. İddialara görə, Vaşinqton ictimaiyyətdə müharibəyə qarşı narazılığın artmaması üçün itkiləri gizlətməyə çalışır. Bu gəlişmələr ABŞ daxilində İran müharibəsinin həm maliyyə, həm də insani bədəli ətrafında siyasi qarşıdurmanı daha da alovlandırıb.
