BAKI,VOA, Nailə Babazadə
ABŞ Prezidenti Donald Tramp sosial media hesabı vasitəsilə İranla bağlı kritik açıqlamalar verərək regionda gərginliyi yenidən artırıb.
VOA xəbər verir ki, ABŞ və İran nümayəndə heyətlərinin qalıcı atəşkəs müzakirələri aparmaq üçün bu gün Pakistanın paytaxtı İslamabada səfər etməsi gözlənildiyi bir vaxtda, Tramp Tehran rəhbərliyini atəşkəs şərtlərinini dəfələrlə pozmaqda ittiham edib. Atəşkəs müddətini uzatmaq niyyətində olmadıqlarını vurğulayan ABŞ lideri, İranın başqa çıxış yolunun olmadığını və sonda çox yaxşı bir razılaşmanın əldə olunacağına inandığını bildirib. Tramp, xüsusilə "ordu hərəkətə keçməyə can atır" ifadəsini işlədərək hərbi variantın hələ də masada olduğuna işarə edib.
Bu bəyanatlar fonunda ABŞ vitse-prezidenti JD Vansın rəsmi danışıqlarda iştirak etmək üçün bu gün İslamabada gedəcəyi barədə iddialar yayılıb. Xatırladaq ki, fevralın 28-də ABŞ və İsrailin İrana qarşı başlatdığı hücumlar nəticəsində alovlanan müharibə, aprelin 8-də əldə olunmuş müvəqqəti atəşkəslə dayandırılmışdı. Aprelin 11-də Pakistanın vasitəçiliyi ilə keçirilən ilk görüşlər isə tərəflərin ortaq məxrəcə gələ bilməməsi səbəbindən nəticəsiz başa çatmışdı.
Hazırda diplomatik kulislərdə ziddiyyətli məlumatlar dolaşmaqdadır. "Al Jazeera" telekanalı iranlı "ön müzakirə heyətinin" artıq İslamabada çatdığını bildirsə də, Tehran tərəfi rəsmi heyət göndərilməsi barədə hələlik heç bir təsdiqedici açıqlama verməyib. "New York Post" qəzetinə danışan mənbələr isə İranın ikinci raund danışıqlar üçün istəkli olduğunu, lakin yekun qərarın hələ qəbul edilmədiyini bildirirlər. Trampın bu son çıxışının danışıqlar ərəfəsində Tehrana qarşı psixoloji təzyiqi artırmaq məqsədi daşıdığı ehtimal olunur.
