BAKI,VOA,Yusif Şərifzadə

Beynəlxalq Valyuta Fondunun strategiya məsələləri üzrə direktoru Kristian Mumssen ABŞ ilə İran arasında davam edən qarşıdurmanın enerji təchizatını uzun müddət pozacağı təqdirdə bunun qlobal iqtisadiyyata ciddi təsir göstərə biləcəyi barədə xəbərdarlıq edib.

VOA xəbər verir ki, Mumssen bildirib ki, ABŞ–İran qarşıdurmasının davam etməsi fonunda Beynəlxalq Valyuta Fondunun oktyabr ayı üzrə iqtisadi proqnozlarını hazırlamaq daha çətin olacaq.

Onun sözlərinə görə, Fond mövcud qeyri-müəyyənliyi nəzərə alaraq müxtəlif mümkün inkişaf ssenariləri üzərində işləməyə davam edəcək.

Kristian Mumssen qeyd edib ki, bir çox ölkələr üçün enerji qiymətlərində baş verən dəyişikliklər həlledici əhəmiyyət daşıyır.

O vurğulayıb ki, enerji təchizatında uzunmüddətli fasilələr baş verərsə, bunun qlobal iqtisadi artıma və inflyasiyaya mənfi təsir göstərməsi mümkündür.

Beynəlxalq Valyuta Fondu daha əvvəl cari il üzrə dünya iqtisadiyyatında artım tempini 3 faiz səviyyəsində proqnozlaşdırmışdı.

Ekspertlər hesab edirlər ki, Yaxın Şərqdə gərginliyin uzanması enerji bazarlarında qeyri-müəyyənliyi daha da artıraraq qlobal iqtisadiyyat üçün əlavə risklər yarada bilər.