BAKI,VOA Orxan Qədirzadə
Portuqaliya millisinin və Səudiyyə Ərəbistanının "Əl-Nəsr" klubunun hücumçusu Kriştianu Ronaldo ilə onun nişanlısı, model Corcina Rodriqes gələn həftəsonu Portuqaliyanın Madeyra adasında evlənəcək.
Məlumata görə, cütlüyün nikah mərasiminin Ronaldonun doğulub boya-başa çatdığı Funşal şəhərindəki kilsədə keçirilməsi, toy şənliyinin isə beşulduzlu Savoy Palace otelində təşkil olunması planlaşdırılır. Bildirilir ki, otel rəhbərliyi qonaqlara cümə və şənbə günləri iki mərtəbənin, həmçinin bir neçə bar zonasının tədbir səbəbindən istifadəyə bağlanacağını xəbər verib.
Məlumatlarda qeyd olunur ki, Funşalın seçilməsi Ronaldonun doğma şəhərinə və ailə köklərinə bağlılığı ilə əlaqələndirilir.
Qeyd edək ki, Kriştianu Ronaldo 2025-ci ildə Corcina Rodriqesə evlilik təklifi edib. Cütlük 2016-cı ildən birlikdədir və iki övlad sahibi olmaqla yanaşı, Ronaldonun digər uşaqlarını da birlikdə böyüdür.
