BAKI,VOA,Yusif Şərifzadə

Cənubi Afrikanın Keyptaun Beynəlxalq Hava Limanının əsas uçuş-enmə zolağı Kenya Airways aviaşirkətinə məxsus təyyarənin eniş zamanı təkərlərinin sıradan çıxması səbəbindən müvəqqəti bağlanıb.

VOA xəbər verir ki, Cənubi Afrika Hava Limanları Şirkətinin məlumatına görə, hadisə yerli vaxtla 15:25-də baş verib.

Bildirilib ki, təyyarədə olan bütün sərnişinlər təhlükəsiz şəkildə təxliyə edilib və insident nəticəsində xəsarət alan olmayıb.

Hava limanının nümayəndəsinin sözlərinə görə, yerli vaxtla saat 18:00-a olan məlumata əsasən, nasaz təyyarə hələ də uçuş-enmə zolağında qalıb.

Hadisə ilə əlaqədar bütün gələn beynəlxalq və daxili reyslər alternativ hava limanlarına yönləndirilib. Daxili uçuşların yola salınması davam etsə də, beynəlxalq reyslərin yola salınması müvəqqəti dayandırılıb.

Keyptaun Cənubi Afrikanın ən məşhur turizm mərkəzlərindən biridir və şəhərin beynəlxalq hava limanı ölkənin Yohannesburqdan sonra ikinci ən işlək hava limanı hesab olunur.