BAKI,VOA,Yusif Şərifzadə
Xorvatiya, Almaniya, Fransa və Yunanıstanda baş verən meşə yanğınları turizm bölgələrini təhdid edib, nəticədə minlərlə insan təxliyə olunub, xəsarət alanlar var. Avropada yüksək temperatur və quraqlığın yanğınların yayılması üçün əlverişli şərait yaratdığı bildirilir.
VOA xəbər verir ki, Xorvatiyanın Omiş şəhərində meşə yanğını gecə saatlarında yaşayış məntəqəsinə doğru yayılaraq evləri əhatə edib. Yanğın səbəbindən təxminən 1 000 nəfər təxliyə edilərək Omişdən Splitə qədər bir neçə yaşayış məntəqəsində yaradılan təcili sığınacaqlara yerləşdirilib.
Split şəhərində təcili tibbi yardım əməkdaşları tərəfindən təxminən 36 nəfərə tibbi yardım göstərilib. Onlardan 14-ü xəstəxanaya yerləşdirilib, yeddi nəfərin vəziyyətinin həyati təhlükəli olduğu bildirilib.
Almaniyanın qərbində isə Belçika sərhədi yaxınlığında başlayan meşə yanğınının yaşayış məntəqəsinə doğru yayılması nəticəsində 2 000-dən çox insan evlərindən təxliyə edilib. Yerli hakimiyyət orqanları yanğının yaşayış məntəqəsi üçün təhlükə yaratdığını açıqlayıb.
Fransanın cənub-qərbində yerləşən Landes bölgəsində baş verən yanğın nəticəsində Luqlon kəndindən 525 nəfər təxliyə olunub. Ərazi bu yay artıq böyük meşə yanğınlarının dağıntısına məruz qalan bölgələrə yaxın yerləşir.
Luqlon turizm baxımından məşhur Arkason körfəzi ərazisindən təxminən 100 kilometr cənub-şərqdə yerləşir. İyulun sonlarında həmin bölgədə baş verən iki böyük meşə yanğını 50 000 hektardan çox ərazini məhv edib və 220 000-ə qədər insanın təxliyəsinə səbəb olub.
Yunanıstanın şimalındakı Halkidiki bölgəsində də yüzlərlə turist cümə axşamı meşə yanğınının sahilə doğru sürətlə irəliləməsi səbəbindən çimərlik ərazisindən uzaqlaşdırılıb.
Alimlər Avropanın müxtəlif bölgələrində müşahidə olunan yüksək temperatur və quraqlığın iqlim dəyişiklikləri ilə əlaqəli olduğunu bildirirlər. Xüsusilə Fransa, İspaniya və Yunanıstanda meşə yanğınlarının yaranması və sürətlə yayılması üçün əlverişli hava şəraiti formalaşıb.
Balkan ölkələri də son dövrdə bir neçə istilik dalğasının təsirinə məruz qalıb. Yüksək temperatur və yağıntının azlığı nəticəsində yaranan quraqlıq meşə yanğınları riskini daha da artırıb.
Avropanın əsas turizm bölgələrində yanğınların yayılması yay istirahəti mövsümünün ən sıx dövrünə təsadüf edib. Hadisələr həm yerli əhali, həm də turistlər üçün təhlükəsizlik risklərini artırıb.
