İsrailin sağçı deputatı Tsvi Sukot İordan çayının qərb sahilində Fələstində həlak olanların xatirəsinə ucaldılmış memorialı dağıdıb. Hadisə İsrail daxilində həm hökumət, həm də müxalifət nümayəndələrinin sərt tənqidlərinə səbəb olub.
Sukot Nablusun şimalındakı Madama kəndinə səfəri zamanı çəkiclə üzərində Fələstinlilərin adları yazılmış memorialı dağıdıb. Hadisənin İsrail hərbçilərinin iştirakı ilə baş verdiyi və görüntülərin sosial şəbəkələrdə yayıldığı bildirilib.
Müxalifət liderləri Sukotun hərəkətini İsrailin beynəlxalq nüfuzuna zərər vuran addım kimi qiymətləndiriblər. Qadi Ayzenkot onun davranışını “ayıb” adlandıraraq baş nazir Benyamin Netanyahu hökumətini İordan çayının qərb sahilində qanunun aliliyini zəiflətməkdə ittiham edib.
Keçmiş müdafiə naziri Benni Qants da deputatların qanunlara riayət etməli olduğunu bildirərək hadisəni “nə sağçılıq, nə də millətçilik, anarxiya” kimi qiymətləndirib. Müxalifət liderləri Yair Qolan və Naftali Bennet isə Sukotun hərəkətinə görə məsuliyyətə cəlb olunmasını tələb ediblər.
Baş nazir Benyamin Netanyahu qanunun pozulmasının, xüsusilə ictimai vəzifə daşıyan şəxslər tərəfindən belə davranışın qəbuledilməz olduğunu bildirib. Xarici işlər naziri Gideon Saar da qərarların yalnız dövlət qurumları, ordu və təhlükəsizlik qüvvələri tərəfindən qəbul edilməli olduğunu vurğulayıb.
Bununla yanaşı, İsrailin maliyyə naziri və ifrat sağçı siyasətçi Betsalel Smotriç Sukotu müdafiə edib. O, memorialın çoxdan dağıdılmalı olduğunu və İordan çayının qərb sahilində buna bənzər digər abidələrin də sökülməli olduğunu bildirib.
İsrail ordusu isə açıqlamasında Sukotun avqustun 12-də bölgəyə səfər üçün müraciət etdiyini və səfərin hərbçilərin mühafizəsi altında keçirildiyini bildirib. Ordunun məlumatına görə, deputat və köməkçiləri razılaşdırılmış planın əksinə hərəkət edərək Madama kəndində abidələrdən birini icazəsiz dağıdıblar.
Hadisə İsraildə hökumətin ifrat sağçı qüvvələrlə münasibətləri və İordan çayının qərb sahilində nəzarət məsələsi ətrafında siyasi mübahisələri yenidən gündəmə gətirib.
