BAKI,VOA Orxan Qədirzadə
İsrailin Baş naziri Binyamin Netanyahu seçkiqabağı qapalı görüşlərdə Likud Partiyasının 10 mandat itirdiyini və vəziyyət dəyişməsə, seçkilərdə məğlub ola biləcəklərini etiraf edib.
İsrailin ictimai yayım qurumu KAN-ın məlumatına görə, Netanyahu oktyabrın 27-də keçirilməsi planlaşdırılan parlament seçkiləri öncəsi partiyasının mövqeyini müzakirə edib. Baş nazirin qapalı toplantılardan birində “10 mandat itirmişik və onları necə geri qaytaracağımızı bilmirəm” dediyi bildirilir.
Məlumata əsasən, Netanyahu vəziyyətin dəyişməyəcəyi təqdirdə rəhbərlik etdiyi Likud Partiyasının seçkilərdə məğlub ola biləcəyini düşünür. Onun seçki kampaniyasının strategiyasını hələ müəyyənləşdirmədiyi və öz mövqeyini əlverişli göstərən sorğulara da şübhə ilə yanaşdığı qeyd olunur.
Netanyahunun fikrincə, Likudun real vəziyyəti bəzi sorğularda göstəriləndən daha pis ola bilər.
Likud iddiaları təkzib edib
Likud Partiyası KAN-a açıqlamasında xəbəri rədd edib və məlumatı “yalan xəbər” adlandırıb.
Partiyanın açıqlamasında bildirilib ki, “Likud Binyamin Netanyahunun rəhbərliyi ilə seçkilərdə qalib gələcək”.
Bununla belə, İsrail mediasında yayımlanan müxtəlif rəy sorğuları müxalifətin seçki yarışında önə çıxdığını göstərir. Sağ yönümlü media orqanlarının bəzi sorğularında isə Netanyahu və Likud daha güclü mövqedə təqdim olunur.
Müxalifət bloku öndədir
Kanal 13-ün son sorğusuna əsasən, seçkilər hazırda keçirilsəydi, Qadi Eyzenkotun rəhbərlik etdiyi “Yashar” Partiyası 24, Likud isə 19 mandat qazanardı.
Sorğuda Eyzenkotun rəhbərlik etdiyi müxalifət blokunun 57, Netanyahu koalisiyasının isə 48 mandat əldə edəcəyi proqnozlaşdırılıb. İsrail vətəndaşı olan fələstinliləri təmsil edən partiyaların isə 15 mandat qazanacağı bildirilib.
120 yerlik Knessetdə hökumət qurmaq üçün ən azı 61 deputatın dəstəyi tələb olunur.
Baş nazirliyə kimin daha uyğun olduğu ilə bağlı sualda da Eyzenkot üstünlük əldə edib. Respondentlərin 46 faizi Eyzenkotu, 35 faizi isə Netanyahunu seçib. 19 faiz iştirakçı isə qərarsız qalıb.
76 yaşlı Netanyahu 2022-ci ilin dekabrından İsrail hökumətinə rəhbərlik edir. Onun hakimiyyəti dövründə ölkə həm daxili siyasi böhranlar, həm də Qəzza müharibəsi fonunda ciddi təzyiqlərlə üzləşib.
