Bakı, AzerVoice

Rusiya prezidenti Vladimir Putin Bakı-Qroznı reysini yerinə yetirən təyyarənin Aktauda qəzaya uğraması nəticəsində ölənlərin ailələrinə başsağlığı verib.

AzerVoice xəbər verir ki, V.Putin bu barədə MDB ölkələrinin dövlət başçılarının qeyri-rəsmi görüşünün açılışında deyib.

"Faciə bu gün Aktauda baş verib. Təyyarə qəzaya uğradı, ölən var, çoxlu yaralı var. Sizin adınızdan həlak olanların ailələrinə və bütün zərərçəkənlərə başsağlığı vermək istəyirəm. Onların sağalmasına ümid edək", - deyə o bildirib.

Xatırladaq ki, bu gün Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb. Qazaxıstanın Nəqliyyat Nazirliyindən bildirilib ki, Aktau şəhərində qəzaya uğrayan təyyarənin göyərtəsində 37 Azərbaycan vətəndaşı olub.

"İlkin məlumatlara görə, təyyarənin göyərtəsində 37 Azərbaycan, 6 Qazaxıstan, 3 Qırğızıstan, 16 Rusiya vətəndaşı olub", - deyə Nazirliyin məlumatında bildirilir.

AZAL-dan bildirilib ki, Aktau şəhərində qəzaya uğrayan Bakı-Qroznı reysini yerinə yetirən "Embraer 190" təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub.