Ankarada ikinci Qarabağ müharibəsi şəhidlərinin xatirəsi anılıb

Azərbaycanın Ankaradakı səfirliyi 27 sentyabr - Anım günü münasibətilə Türkiyənin paytaxtı Ankarada tədbir təşkil edib.

AzerVoice xəbər veirir ki, “Qarabağ Azərbaycandır” devizi ilə təşkil olunan tədbir Türkiyə-Azərbaycan Dostluq, Əməkdaşlıq və Həmrəylik Fondunda (TADİV) keçirilib.

Şəhid ailələrinin iştirak etdiyi tədbirdə bürokratlar, vətəndaş cəmiyyəti nümayəndələri, siyasi partiya üzvləri, hərbçilər və çoxsaylı qonaq iştirak edib.

Sükut dəqiqəsi, dövlət himnlərinin oxunması və Qurani-Kərimin tilavətindən sonra iştirakçılara Qarabağın tarixini əks etdirən videoçarx nümayiş etdirilib.

Tədbirdə çıxış edən Azərbaycanın Ankaradakı səfiri Rəşad Məmmədov müharibədə şəhid olan Azərbaycan əsgərlərinə Allahdan rəhmət diləyib.

Səfir Məmmədov bildirib ki, Azərbaycanın ərazi bütövlüyünü canları bahasına müdafiə edən əsgərlərin yazdığı dastan indi məktəblərdə öyrədilir.

Türkiyənin Prezident Təhlükəsizlik və Xarici Siyasət İdarə Heyətinin üzvü və TADİV İdarə Heyətinin sədri Prof. Dr. Aygün Attar çıxışında azad edilən bölgələr haqqında məlumat paylaşıb.

Səfirliyin nəzdində fəaliyyət göstərən Azərbaycan Mədəniyyət Mərkəzinin direktoru Samir Abbasov 44 gün ərzində Vətənin azadlığı uğrunda gedən mübarizə ilə bütün dünyaya qəhrəmanlıq nümunəsi göstərildiyini bildirib.

Abbasov qeyd edib ki, “milli qəhrəmanlarımız” olan əsgərlərimizin mübarizəsi, vətən sevgisi gələcək nəslə öyrədilməlidir.

Anma mərasimində Qarabağda şəhid olanlar üçün yazılmış şeir kitabının təqdimatı keçirildi. Həmçinin müharibə dövrünü əks etdirən fotoşəkillərdən ibarət sərgi açılıb.