BAKI,AzerVoice
“Beynəlxalq Sülh və Rifah Naminə Tramp Marşrutu” (TRIPP) dayanıqlı sülhə və regional əlaqəliliyin gücləndirilməsinə aparan yolda mühüm mərhələdir.
AzerVoice xəbər verir ki, bu fikri Azərbaycan Respublikası Prezidentin xüsusi tapşırıqlar üzrə nümayəndəsi Elçin Əmirbəyov “JASON redaksiya heyətinə müsahibəsində bildirib.
“TRIPP sadəcə bir yol deyil; bu, etimad, əməkdaşlıq və rifah marşrutudur. Azərbaycan qəti şəkildə inanır ki, onun həyata keçirilməsi istisnasız olaraq bütün tərəflər üçün fayda gətirə bilər, belə ki, layihə regionda sülhün möhkəmlənməsinə, sabitliyin əldə olunmasına və iqtisadi inkişafın təşviqinə xidmət edir. Buna görə də biz bütün tərəfləri onu həqiqi, uduzmaq ehtimalı olmayan layihə kimi dəyərləndirməyə dəvət edirik”, – deyə E.Əmirbəyov bildirib.
Müsahibədə Əmirbəyov Azərbaycanın fəaliyyətinin daha geniş regional və beynəlxalq kontekstini də müzakirə edib. O, Azərbaycanın Avropaya enerji ixracını, o cümlədən təbii qaz tədarükünü və “yaşıl” enerji sahəsində yeni layihələri vurğulayıb, həmçinin dəhlizin Türkiyə, Mərkəzi Asiya və türk dünyası ilə ticarət və nəqliyyat əlaqələrinin möhkəmləndirilməsindəki rolunu qeyd edib. O, ekoloji əməkdaşlıq məsələlərinə, xüsusilə “yaşıl” texnologiyalar sahəsində hollandiyalı tərəfdaşlarla birgə fəaliyyətə toxunub və Azərbaycanın Rusiya və İranla balanslaşdırılmış xarici siyasətə sadiqliyini təsdiqləyib. Bununla yanaşı, o, minalanmış ərazilər və Ermənistanın konstitusion məsələləri kimi mövcud problemləri qeyd edib ki, bunlar uzunmüddətli sülhün təmin olunmasında əsas maneələr olaraq qalır.
Qeyd edək ki, avqustun 8-də Vaşinqtonda Azərbaycan Prezidenti İlham Əliyev və Ermənistanın Baş naziri Nikol Paşinyan ABŞ Prezidentinin iştirakı ilə birgə bəyannamə imzalayıblar. Sənəddə regional əlaqələrin bərpası çərçivəsində Zəngəzur dəhlizinin (“Tramp marşrutu”) istifadəyə verilməsi nəzərdə tutulur. Bununla yanaşı, iki ölkənin xarici işlər nazirləri “Sülh və Dövlətlərarası Münasibətlər haqqında” Sazişi paraflayıblar.
