BAKI,VOA, Fərid Mikayılov

Qətər İsrail qüvvələrinin işğal altındakı Şərqi Qüdsdə BMT-nin Fələstinli Qaçqınlara Yardım və İşlərin Təşkili üzrə Yaxın Şərq Agentliyinin (UNRWA) mühüm obyektlərindən birinə basqın etməsini kəskin şəkildə pisləyib. Doha hadisəni beynəlxalq humanitar hüququn açıq şəkildə pozulması kimi qiymətləndirib.

VOA xəbər verir ki, Qətər Xarici İşlər Nazirliyi yaydığı bəyanatda İsrailin UNRWA obyektlərini sistemli şəkildə hədəfə aldığını bildirib.

Nazirliyin açıqlamasına görə, bu addımlar Qəzza zolağı, işğal altındakı İordan çayının qərb sahili, İordaniya, Suriya və Livanda yaşayan milyonlarla fələstinlini zəruri xidmətlərdən məhrum etmək məqsədi daşıyır.

Qətər beynəlxalq ictimaiyyəti UNRWA-nın qorunması üçün dərhal hərəkətə keçməyə çağırıb.

İsrail qüvvələri çərşənbə axşamı işğal altındakı Şərqi Qüdsün Kəfr Əqab bölgəsində yerləşən Qələndiya Təlim Mərkəzinə basqın edib. Mərkəz UNRWA-nın Fələstin ərazilərindəki fəaliyyətində mühüm əhəmiyyət daşıyır.

Məlumata görə, İsrail qüvvələri obyektə nəzarəti ələ keçirdikdən sonra əməkdaşlara ərazini tərk etmək barədə göstəriş verib. İsrail tərəfi mərkəzin bağlanacağını da açıqlayıb.

Basqın zamanı İsrailin milli təhlükəsizlik naziri İtamar Ben-Qvir də ərazidə olub.

İsrail UNRWA-nı 2023-cü il oktyabrın 7-də baş verən hücumlarda iştirak edən HƏMAS üzvlərinə şərait yaratmaqda ittiham edib. Beynəlxalq Ədalət Məhkəməsi isə İsrailin UNRWA ilə bağlı irəli sürdüyü ittihamları əsaslandırmaq üçün kifayət qədər sübut təqdim etmədiyini bildirib.