BAKI, AzerVoice, Nailə Babazadə
Qazaxıstanın iki palatadan ibarət mövcud parlament sistemi ləğv edilir və ölkə birpalatalı qanunverici orqan sisteminə keçir.
AzerVoice xəbər verir ki, Qızılorda şəhərində keçirilən Milli Qurultayın 5-ci iclasında çıxış edən Prezident Kasım-Jomart Tokayev yeni yaradılacaq parlamentin "Qurultay" adlandırılacağını rəsmi şəkildə elan edib. Dövlət başçısı bu adın xalq üçün dərin tarixi mənaya malik olduğunu və ölkənin siyasi sistemində mühüm dövlət rəmzi kimi qalmasının vacibliyini vurğulayıb.
Yeni islahat paketində parlamentin strukturu və səlahiyyətləri köklü şəkildə yenidən qurulur. Peşəkarlığı artırmaq məqsədilə Qurultayda deputat yerlərinin sayı 145 olaraq müəyyən edilib və parlamentdə prezident kvotası tamamilə ləğv edilib. Bundan əlavə Konstitusiya Məhkəməsi, Hesablama Palatası və Mərkəzi Seçki Komissiyasının rəhbər heyəti artıq prezident təyinatı ilə deyil, yalnız parlamentin təsdiqi ilə vəzifəyə gələcək. Bu addım qanunverici orqanın nəzarət funksiyasını gücləndirməyə xidmət edir.
Parlamentə seçkilər proporsional sistemlə keçiriləcək və partiyalar üçün 5 faizlik seçki baryeri tətbiq olunacaq. Tokayev bu sistemin siyasi partiyaların cəmiyyət qarşısındakı məsuliyyətini artıracağını qeyd edib. Birpalatalı sistemə keçid üçün yeni Konstitusiyanın hazırlanması nəzərdə tutulur və bu məqsədlə xüsusi Konstitusiya Komissiyası yaradılacaq. Komissiyanın hazırladığı təkliflər qəbul edildikdən sonra yeni sistemin təsdiqi üçün referendum tarixinin müəyyənləşdiriləcəyi bildirilir.
