Səudiyyə Musiqi Komissiyası və "Jazz in Jeddah" platforması arasında imzalanan strateji tərəfdaşlıq sayəsində gənc səudiyyəli musiqiçilər yeni təlim, mentorluq və beynəlxalq səhnələrdə çıxış imkanları əldə edəcəklər.
Rəsmi bəyanata əsasən, bu əməkdaşlıq həm yerli istedadları üzə çıxarmaq, həm də birgə konsertlər və mədəni mübadilə təşəbbüsləri vasitəsilə Səudiyyə və xarici musiqiçiləri bir araya gətirmək məqsədi daşıyır.
"Call of Culture" təşkilatının dəstəyi ilə keçirilən "Jazz in Jeddah" layihəsi Tarixi Ciddə ərazisində caz musiqisini Səudiyyənin musiqi irsi ilə sintez edən tədbirlər təşkil edir və gənc ifaçılar üçün əlverişli platforma rolunu oynayır.
Platforma həmçinin hər il 10-dan çox ölkədə keçirilən beynəlxalq festivallarla əməkdaşlıq edərək səudiyyəli sənətçilərin dünya səviyyəsində tanınmasına və mədəni mübadiləyə geniş imkanlar yaradır.
Yeni tərəfdaşlıq çərçivəsində səudiyyəli musiqiçilər xarici ifaçılarla birgə çalışmaq, təcrübə toplamaq və Krallığın sürətlə inkişaf edən musiqi mühitini qlobal musiqi ictimaiyyəti ilə birləşdirən ortaq layihələrdə yer almaq şansı qazanacaqlar.
"Səudiyyə dinləyiciləri və musiqiçiləri dunya səviyyəli səhnəyə layiqdirlər", - deyə "Jazz in Jeddah" platformasının təsisçisi Məhəmməd Bəxrəibə bildirib.
"Bu strateji əməkdaşlıq bir tərəfdən caz musiqisinin ölkədəki nüfuzunu artırmaq, digər tərəfdən isə Səudiyyə sənətçilərinə və zəngin musiqi irsimizə sərmayə qoymaq imkanlarımızı daha da möhkəmləndirir".
Bu anlaşma Musiqi Komissiyası ilə "Jazz in Jeddah" arasında daha əvvəl imzalanmış qarşılıqlı anlaşma memorandumuna əsaslanır və Səudiyyə Ərəbistanının musiqi sənayesinin inkişafında özəl sektorun iştirakını təşviq etmək məqsədi daşıyır.
Müştərək fəaliyyət Krallığın canlı musiqi və mədəniyyət mühiti genişlənməyə davam etdikcə, müxtəlif musiqi üslublarını nümayiş etdirməyə və cazın Səudiyyə musiqi ənənələri ilə əlaqələrini araşdırmağa yönələcək.
Səudiyyə Musiqi Komissiyasının icraçı direktoru Pol Pasifiko dövlət qurumları ilə özəl sektor arasındakı əməkdaşlığın musiqiçilər üçün davamlı imkanlar yaratmaq baxımından böyük əhəmiyyət kəsb etdiyini vurğulayıb.
"Jazz in Jeddah dinləyicilər və sənətçilər arasında dəyərli bir bağ qurmağı bacarıb. Bu tərəfdaşlıq Səudiyyə Ərəbistanının musiqi mühitini zənginləşdirən və onun beynəlxalq mədəniyyət səhnəsindəki mövqeyini gücləndirən uzunmüddətli imkanlar yaratmağımıza zəmin yaradır", - deyə o əlavə edib.
