Ər-Riyaddakı Səudiyyə Ərəbistanı Müasir İncəsənət Muzeyi (SAMoCA) "SAIF 2026" adlı yay proqramı çərçivəsində avqustun 29-dək davam edən emalatxanalar, film nümayişləri və gənc auditoriya üçün nəzərdə tutulmuş müxtəlif fəaliyyətlərlə yerli yaradıcılığı ön plana çıxarmağı hədəfləyir.
"Bizim missiyamız ən aktual və dinamik yaradıcı səsləri auditoriyamıza təqdim etməkdir. 'SAIF 2026' məhz bu məqsədlə hazırlanıb. Cəmiyyətimizə daha çox praktiki təcrübələr vasitəsilə incəsənəti və SAMoCA-nı kəşf etmək, eləcə də onunla təmasda olmaq üçün yeni yollar təklif etmək. Hədəfimiz hər zaman müxtəlif yaradıcı sahələri platformaya çevirməkdir və şəhərdə müasir incəsənətə həsr olunmuş yeganə təsisat olaraq inanırıq ki, Caks məhəlləsindəki SAMoCA bunun üçün ən ideal məkandır".-deyə, SAMoCA-nın direktoru Nura əl-Məşuq bildirib.
Tədbirlər fotoqrafiya və yazı yaradıcılığından tutmuş keramika, moda dizaynı və səsləndirmə (voiceover) təcrübələrinə qədər geniş bir spektri əhatə edir. Proqram qeyri-kommersiya təşkilatı olan "Art of Heritage", interaktiv təhsil və mədəniyyət layihələri üzrə ixtisaslaşmış "Knowliom" şirkəti və incəsənət ləvazimatlarını təmin edən "Color Theory" ilə əməkdaşlıq çərçivəsində həyata keçirilir.
"Təsisat olaraq əsas diqqətimiz müasir incəsənətə yönəlsə də, SAMoCA mədəni irsimizə və cəmiyyətimizin dəyərlərinə dərindən bağlıdır. Məhz buna görə də 'Art of Heritage' kimi təşkilatlarla tərəfdaşlıq bizə həm bədii ənənələrimizin zənginliyini nümayiş etdirən, həm də onların müasir təzahürlərini göstərən proqramlar hazırlamağa imkan verir", - deyə Əl-Məşuq qeyd edib.
Səudiyyə Ərəbistanının mədəniyyət mühitinin sürətlə genişlənməsi və gənclərin incəsənətlə ənənəvi məkanlardan kənarda daha fəal təmas qurması fonunda SAMoCA kimi təsisatlar yaradıcılığı hər kəs üçün daha əlçatan və gündəlik həyatın bir hissəsinə çevirmək öhdəliyini bölüşürlər.
"Gənc ziyarətçilərin öz yaradıcılıq yollarını tapmalarını, üfüqlərini genişləndirmələrini və özlərinə məxsus unikal prosesləri formalaşdırmalarını izləmək olduqca gözəl və sevindirici təcrübədir. Onlar bizə xatırladırlar ki, yaradıcılıq təkcə hazır əsərdən ibarət deyil, həm də sərbəst axtarışların verdiyi sevinc deməkdir", - deyə Əl-Məşuq əlavə edib.
"'SAIF 2026' çərçivəsindən kənarda da iştirakçılarımızın yaradıcı proseslə daha dərin bağ quraraq və öz bədii potensiallarına daha güclü inanaraq buradan ayrılmalarını arzulayıram. Mədəniyyət insanları birləşdirmək üçün gözəl bir vasitədir, buna görə də onların bu müddətdə yeni dostluqlar quracaqlarına və cəmiyyət daxilində daha güclü tellər yaradacaqlarına ümid edirəm".
