Bakı. AzerVoice:

Yanvarın 24-də Dini Qurumlarla İş üzrə Dövlət Komitəsinin (DQİDK) Quba bölgəsi üzrə şöbəsinin, Quba Rayon İcra Hakimiyyətinin və İnsan Hüquqları üzrə Müvəkkilin Quba regional mərkəzinin birgə təşkilatçılığı ilə “Dini radikalizm və ekstremizmlə mübarizə yolları: hüquqi və mənəvi müstəvi” mövzusunda dəyirmi masa formatında seminar keçirilib.

AzerVoice xəbər verir ki, seminarda DQİDK-nın Quba bölgəsi üzrə şöbəsinin müdir müavini Elnur Ağasiyev, Quba Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini – dini qurumlarla işin təşkilatçısı Anar Məmmədov, İnsan Hüquqları üzrə Müvəkkilin Şimal regional mərkəzinin əməkdaşı Murad Əsgərov, din xadimləri və pedaqoqlar iştirak edib.

Çıxışlar zamanı, dini radikalizm anlayışı, dini radikalizmin, ekstremizmin yaranmasının səbəbləri və onun ağır fəsadları, dini radikalizmdən qorunmağın yolları haqqında məlumat verilib. Qeyd edilib ki, dini radikalizmlə mübarizə çərçivəsində həm DQİDK tərəfindən, həm də müvafiq qurumlarla birgə ardıcıl iş aparılır, tədbirlər təşkil olunur, maarifləndirici dini ədəbiyyat nəşr edilir və əsasən gənclər arasında paylanılır. Bildirilib ki, dini radikalizmə qarşı effektli mübarizə yolu savadlı və bilikli gəncliyin yetişdirilməsindən keçir.

Dəyirmi masa müzakirələrlə davam etdirilib.