Bakı, AzerVoice

Beynəlxalq Hava Nəqliyyatı Assosiasiyası (IATA) 25 dekabrda baş vermiş "Azərbaycan Hava Yolları" (AZAL) təyyarə qəzasının hərtərəfli, qərəzsiz və şəffaf şəkildə araşdırılmasına çağırıb.

AzerVoice xəbər verir ki, bu barədə IATA-nın baş direktoru Villi Uolşun bəyanatında deyilir.

"Mülki hava gəmiləri heç bir halda, nə məqsədli, nə də təsadüfən hərbi əməliyyatların hədəfi olmamalıdır. Bir sıra ölkələrin, o cümlədən Rusiya və Azərbaycanın hökumətlərinin açıqlamalarına görə, AZAL-ın 8243 saylı reysi ilə uçan təyyarənin qəzasının hərbi əməliyyatlar nəticəsində baş verməsi ehtimalı çox yüksəkdir. Bu fakt araşdırmanın dəqiq, şəffaf və qərəzsiz aparılmasının xüsusi əhəmiyyətini vurğulayır.

Dünya, Çikaqo Konvensiyasına əsasən beynəlxalq öhdəliklər çərçivəsində, 30 gün ərzində araşdırmanın aralıq hesabatının dərc olunmasını gözləyir. Əgər bu faciənin səbəbinin hərbi əməliyyatlar olduğu təsdiqlənsə, məsul şəxslər cavab verməli və ədalət qarşısında dayanmalıdır", – deyə IATA-nın baş direktoru Villi Uolş bildirib.

Xatırladaq ki, dekabrın 28-dən 29-na keçən gecən "Azərbaycan Hava Yolları" aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsinin Aktau şəhəri yaxınlığında qəzaya uğraması nəticəsində həlak olan 3 ekipaj üzvünün (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) və 21 sərnişinin nəşləri Bakıya gətirilib.

Daha öncə bu qəzada həlak olan 4 nəfərin nəşi və yaralanan 14 nəfər Bakıya gətirilib.

Xatırladaq ki, dekabrın 25-i Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.

Aktau şəhərində qəzaya uğrayan Bakı-Qroznı reysini yerinə yetirən "Embraer 190" təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub. Hadisə nəticəsində 38 nəfər həlak olub, 29 nəfər isə yaralanıb.