BAKI,AzerVoice
Regionlarda mediasiya institutunun geniş təbliği və hüquqi maarifləndirmənin gücləndirilməsi məqsədilə Quba 1 saylı MT direktoru, hüquqşünas mediator Hümmət Əliyev növbəti maarifləndirici görüşünü Xaçmaz şəhərində keçirib. h
AzerVoice xəbər verir ki, görüş Azərbaycan Respublikasının Vəkillər Kollegiyası-Azerbaijani Bar Association Xaçmaz rayon Vəkil Bürosunun vəkilləri ilə baş tutub.
Tədbir Xaçmaz rayon Vəkil Bürosunda təşkil olunub və qarşılıqlı fikir mübadiləsi şəraitində keçib. Görüş zamanı mediasiya sahəsində aktual yeniliklər, tətbiq mexanizmləri, mediator-vəkil əməkdaşlığının əhəmiyyəti və mediasiyanın məhkəmələrin iş yükünün azaldılmasında rolu ilə bağlı geniş müzakirələr aparılıb. Hümmət Əliyev regionlarda mediasiyanın inkişafının tərəflər arasında daşınmaz hüquq münasibətlərinin daha səmərəli həllinə şərait yaratdığını qeyd edib.
Tədbirə ev sahibliyi edən Xaçmaz rayon Vəkil Bürosunun sədri – peşəkar hüquqşünas vəkil - #VüsalHacıyev mediasiya institutunun vətəndaşlara təqdim olunan hüquqi xidmətin keyfiyyətini artırdığını vurğulayıb. O, mediasiyanın vaxt və resurs baxımından üstünlüklərini qeyd edərək gələcəkdə də bu cür əməkdaşlığın davam etdirilməsinin önəmini bildirib.
Görüşün sonunda Quba 1 saylı Mediasiya Təşkilatının adından Vüsal Hacıyevə əməkdaşlığa verdiyi dəstəyə görə xalça üslubunda hazırlanmış xüsusi Plaket təqdim edilib. Daha sonra xatirə şəkli çəkilib, görüş qarşılıqlı hörmət və əməkdaşlıq ruhunda başa çatıb.
