BAKI,VOA
4 iyun 2026-cı il tarixində Qərbi Azərbaycan İcmasının Qadınlar Şurasının təşəbbüsü ilə “Ortaq Türk mirası: Qərbi Azərbaycanın və Qars bölgəsinin milli geyim mədəniyyəti” layihəsi çərçivəsində Ankarada bir sıra tədbirlər həyata keçirilib.
VOA xəbər verir ki, tədbirlərdə layihənin rəhbəri Məlahət İbrahimqızı, professor Mahirə Hüseynova, millət vəkilləri Tənzilə Rüstəmxanlı və Səbinə Salmanova, dosentlər Könül Həsənova, Həqiqət Hacıyeva, Xatirə Mehdiyeva, Gülzadə Abdulova və Ülviyyə Allahverdiyeva iştirak ediblər. Ankara Universitetinin ev sahibliyi ilə keçirilən elmi konfransda Qərbi Azərbaycan və Qars bölgəsinin milli geyimləri, İrəvan Xan Sarayına aid nümunələr sərgilənib və iştirakçılara Qərbi Azərbaycan mətbəxindən furşet təqdim olunub. Tədbirin məqsədi Qərbi Azərbaycanın zəngin mədəni irsini beynəlxalq ictimaiyyətə çatdırmaq və qorumaqdır.
Konfrans zamanı azərbaycanlıların tarixən yaşadıqları torpaqlardan deportasiyalara məruz qalması, maddi və qeyri-maddi mədəni irsin məhv edilmə halları vurğulanıb. 1987–1991-ci illərdə baş vermiş son deportasiya zamanı təxminən 300 min azərbaycanlı doğma yurdlarından didərgin salınıb. Vurğulanıb ki, Qərbi Azərbaycan mədəni irsinin qorunması beynəlxalq təşkilatların, xüsusilə UNESCO-nun diqqət mərkəzində olmalıdır.
Tədbirlər həm mədəniyyət diplomatiyasının nümunəsi olub, həm də Qərbi Azərbaycan həqiqətlərinin beynəlxalq aləmdə tanıdılmasına xidmət edib. Eyni zamanda, Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın mədəniyyət diplomatiyası sahəsində fəaliyyəti Qarabağ həqiqətlərinin və Xocalı soyqırımının beynəlxalq səviyyədə tanıdılmasına töhfə verib.
