BAKI, AzerVoice
Suriyada son 60 ilin ən böyük quraqlığı səbəbindən 16 milyondan çox insan aclıq təhlükəsi ilə üzləşə bilər.
AzerVoice xəbər verir ki, bu barədə BMT-nin Ərzaq və Kənd Təsərrüfatı Təşkilatının (FAO) Suriyadakı nümayəndəliyi məlumat verib.
FAO nümayəndəsinin köməkçisi Həyyə Əbu Əssaf bildirib ki, buğda məhsulu maksimum 2,7 milyon ton, minimum isə 2,5 milyon ton olacaq. Bu miqdar ölkənin əhalisini doyurmağa kifayət etmir. O qeyd edib ki, təxminən 16,3 milyon insanın bu il ərzaqsız qalmaq riski var.
Əbu Əssafın sözlərinə görə, Suriyada yağıntı miqdarı əvvəlki illərlə müqayisədə xeyli azalıb. Bu, son 60 ilin ən pis iqlim şəraitidir. Hava şəraiti əkilən sahələrin 75 faizini təsirləndirib.
Qeyd edək ki, vətəndaş müharibəsindən əvvəl Suriya buğda baxımından özünü təmin edirdi və ildə orta hesabla 4,1 milyon ton buğda istehsal olunurdu. Lakin 2011-ci ildən başlayan və 14 ildir davam edən müharibə ölkə iqtisadiyyatını dağıdıb.
2011–2018-ci illərdə Suriyanın illik ümumi daxili məhsulu (ÜDM) 55 milyard dollardan 20 milyard dollara qədər azalıb. Əhalinin 80 faizi yoxsulluq həddinin altına düşüb, insanların orta ömür müddəti 20 il qısalıb. Ölkədə həkim, tibb bacısı, müəllim və dövlət qulluqçusu kimi ixtisaslı kadr çatışmazlığı yaşanır.
Xatırladaq ki, ötən ilin dekabrında Suriyada rejim dəyişib, prezident Bəşşar Əsəd devrilib və onun yerinə Əhməd əş-Şəraa prezident seçilib. Yeni hakimiyyət dünya ictimaiyyətindən ölkənin dağılmış iqtisadiyyatının bərpasında kömək istəyib. Avropa İttifaqı (Aİ) Suriyaya qarşı tətbiq olunan sanksiyaları ləğv edib, ABŞ isə onları qismən yumşaldıb.
