Suriya hökuməti Deyr əz-Zor vilayətində səhiyyə xidmətlərinin genişləndirilməsi məqsədilə bir sıra yeni tibbi layihələri istifadəyə verib. Layihələr arasında onkoloji xəstəxananın təməlqoyma mərasimi, ürək kateterizasiyası şöbəsinin və böyrək çatışmazlığından əziyyət çəkən xəstələr üçün dializ bölmələrinin açılması, həmçinin yeni doğulmuşlar üçün intensiv terapiya bölməsinin yaradılması var.
Suriya Səhiyyə Nazirliyinin məlumatına görə, layihələr Deyr əz-Zor və ölkənin şərq bölgələrində tibbi xidmətlərin daha bərabər şəkildə əlçatan olmasına yönəlib.
Səhiyyə naziri Musab əl-Əli və Deyr əz-Zor qubernatoru Ziyad əl-Ayiş keçirdikləri mətbuat konfransında vilayətdə həyata keçirilən əsas tibbi layihələri açıqlayıblar.
Onkoloji xəstəxananın təməli qoyulub
Vilayətdə həyata keçirilən ən böyük layihələrdən biri onkoloji xəstəxananın tikintisidir.
Suriya Prezidenti Əhməd əş-Şəraa avqustun 5-də Deyr əz-Zor Beynəlxalq Hava Limanının açılışı zamanı videobağlantı vasitəsilə xəstəxana layihəsini elan etmişdi. Layihənin ümumi dəyərinin 21 milyon dollar olduğu bildirilir.
Xəstəxananın təxminən 230 çarpayı və onkoloji əməliyyatlar üçün 6 əməliyyat otağına malik olması planlaşdırılır. Tibb müəssisəsində ixtisaslaşmış poliklinikalar, təcili yardım bölməsi, reanimasiya şöbəsi, kimyaterapiya və gündüz müalicəsi bölmələri, hematologiya və onkologiya şöbələri, izolyasiya bölməsi, sümük iliyi transplantasiyası bölməsi, şüa terapiyası, tibbi görüntüləmə və palliativ yardım xidmətlərinin yaradılması nəzərdə tutulur.
Xəstəxananın Deyr əz-Zorla yanaşı Rakka və Həsəkə vilayətlərinə də xidmət göstərən regional tibb mərkəzinə çevrilməsi planlaşdırılır.
Səhiyyə naziri layihənin hazırlanmasının təxminən 4 ay, tikinti işlərinin isə fasiləsiz şəkildə 30 ay davam edəcəyini bildirib.
Deyr əz-Zorda ilk ürək kateterizasiyası şöbəsi
Deyr əz-Zor Milli Xəstəxanasında Suriya-Amerika Tibb Cəmiyyətinin (SAMS) əməkdaşlığı ilə ürək kateterizasiyası şöbəsi də istifadəyə verilib.
Şöbədə ürək kateterizasiyası cihazı və 16 çarpayılı ürək reanimasiya bölməsi yerləşir. Yeni şöbənin bir həftə ərzində tam fəaliyyətə başlaması gözlənilir.
Səhiyyə Nazirliyi bildirib ki, bu bölmə Deyr əz-Zor və ümumilikdə Suriyanın şərq bölgəsində ilk belə tibb müəssisəsidir. Şöbənin fəaliyyətə başlaması ürək xəstələrinin müalicə üçün Dəməşqə və digər bölgələrə göndərilməsinə ehtiyacı azaltmalıdır.
Deyr əz-Zor Milli Xəstəxanasında aşağı ətraf protezlərinin hazırlanması, quraşdırılması və reabilitasiyası üzrə ixtisaslaşmış mərkəz də açılıb.
Məlumata görə, artıq 400 nəfər mərkəzdə qeydiyyatdan keçib. Qeydiyyatdan keçən şəxslərin sayının 5 minə çatacağı və onlara xidmətlərin mərhələli şəkildə göstəriləcəyi gözlənilir.
Körpələr üçün yeni intensiv terapiya bölməsi yaradılıb
Deyr əz-Zor şəhərindəki əl-Huveydi xəstəxanasında körpələr üçün intensiv terapiya bölməsi fəaliyyətə başlayıb.
10 inkubator çarpayısı ilə təchiz olunan bölmənin bölgədə ilk belə ixtisaslaşmış mərkəz olduğu bildirilir. Burada süni tənəffüs və əlavə tənəffüs dəstəyi cihazlarından istifadə ediləcək.
Yeni bölmənin ağır vəziyyətdə olan körpələrin müalicə imkanlarını artıracağı və onların Dəməşqə göndərilməsi ehtiyacını azaldacağı gözlənilir.
Eyni xəstəxanada ağırlaşmalarla müşayiət olunan kəskin qidalanma çatışmazlığının müalicəsi üçün kompleks mərkəz də açılıb. 9 çarpayılı mərkəz bölgədə bu sahədə ilk ixtisaslaşmış müəssisə kimi təqdim edilir.
Mərkəzdə xəstələrin vəziyyətinin qiymətləndirilməsi, müalicəsi və tam sağalana qədər mütəmadi müşahidəsi həyata keçiriləcək.
Bölgədə onlarla tibb mərkəzi yenidən fəaliyyətə başlayıb
Deyr əz-Zor qubernatoru Ziyad əl-Ayiş vilayətdə səhiyyə sektorunun yenidən qurulması istiqamətində yeni mərhələnin başladığını bildirib.
Onun sözlərinə görə, Deyr əz-Zor Milli Xəstəxanasında yanıq, plastik və rekonstruktiv cərrahiyyə, həmçinin neyrocərrahiyyə şöbələri yenidən açılıb və bərpa edilib.
Meyadin şəhərindəki xəstəxanada da bir sıra əsas şöbələrin yenidən qurulduğu bildirilib.
İlkin səhiyyə xidmətləri sahəsində isə vilayət ərazisində 65 tibb mərkəzi yenidən fəaliyyətə başlayıb.
Diaqnostika imkanlarının genişləndirilməsi çərçivəsində iki rentgen cihazı, həmçinin Aişə və Bukamal xəstəxanalarında iki kompüter tomoqrafiyası cihazının quraşdırıldığı açıqlanıb.
Böyrək xəstələri və doğuş xidmətləri üçün yeni imkanlar
Səhiyyə Nazirliyinin həyata keçirdiyi layihələr çərçivəsində Bukamal Milli Xəstəxanasının yenidən qurulması, şəhərdə ixtisaslaşmış doğuş xəstəxanasının istifadəyə verilməsi və Aişə Xəstəxanasının kompüter tomoqrafiyası cihazı ilə təchiz edilməsi də nəzərdə tutulub.
Bukamal şəhərində böyrək dializi şöbəsi də açılıb.
Bundan başqa, Bukamal və Basirə qəsəbəsində tibb bacıları məktəbinin filiallarının yaradılması planlaşdırılır.
Xeyriyyə yardımları da səhiyyə layihələrinə yönəldilib
Səhiyyə layihələrinin maliyyələşdirilməsinə özəl ianələr də cəlb olunub.
Məlumata görə, iş adamlarından biri səhiyyə layihələri üçün 1 milyon dollar ianə edib. Vəsaitin bir hissəsinin Meyadin şəhərində dializ mərkəzinin yaradılmasına yönəldilməsi nəzərdə tutulur.
Bundan əlavə, Kəbacəb kəndindəki tibb məntəqəsinə iki təcili yardım avtomobili verilib, onkoloji mərkəzin tibbi avadanlıqlarla təchiz edilməsi üçün isə 500 min dollar ayrılıb.
Suriya hökuməti bu layihələrlə ölkənin şərq bölgələrində, xüsusilə Deyr əz-Zor və ətraf ərazilərdə səhiyyə infrastrukturunun gücləndirilməsini və əhalinin ixtisaslaşmış tibbi xidmətlərə çıxış imkanlarının artırılmasını hədəfləyir.
