Dəməşqdəki 4-cü Cinayət Məhkəməsi sabiq Suriya prezidenti Bəşşar Əsədin əmisi oğlu Vasim Əsəd barəsində ölüm hökmü çıxarıb.
Məhkəmə onu Şərqi Quta və Məlihə bölgələrində mülki şəxslərin qətlə yetirilməsi, işgəncələrə məruz qoyulması və silahlı qrupların yaradılmasında təqsirli bilib. Məhkəmənin qərarında bu əməllər müharibə və insanlıq əleyhinə cinayətlər kimi qiymətləndirilib.
Vasim Əsədin rəhbərlik etdiyi silahlı qrupların 2011-ci ildən etibarən fəaliyyət göstərdiyi, mülki şəxslərin oğurlanması, qarət edilməsi və qanunsuz edamlarla əlaqəli olduğu bildirilib.
Məhkəmə həmçinin işgəncə nəticəsində daimi əlilliyə səbəb olan qəsdən xəsarət yetirməyə görə 3 il, dələduzluğa görə isə daha 3 il həbs və cərimə müəyyən edib. Lakin daha ağır cəza kimi ölüm hökmünün tətbiqinə qərar verilib.
Məhkəmə narkotik vasitələrin qaçaqmalçılığı və ticarəti ilə bağlı ittihamlardan isə sübutların kifayət etməməsi səbəbilə Vasim Əsədə bəraət verib.
Qərara əsasən, onun əmlakına qoyulmuş həbs icra xarakterli həbsə çevrilib, zərərçəkənlərə kompensasiya ödənilməsi və qalan əmlakın dövlət xəzinəsinə keçirilməsi nəzərdə tutulub.
