Suriyanın Tartus vilayətinin Səfitə şəhərində keçmiş rejim zabitinin saxlanılması məqsədilə keçirilən əməliyyat silahlı toqquşma ilə nəticələnib. Daxili Təhlükəsizlik Komandanlığının məlumatına görə, keçmiş zabit Firas Əbdülkərim Həmmud əməliyyat zamanı öldürülüb.
Təhlükəsizlik qüvvələri bildiriblər ki, Həmmud daha əvvəl saxlanılmağa cəhd edilərkən atəş açıb. Son əməliyyat zamanı da təhlükəsizlik əməkdaşlarına atəş açması nəticəsində qarşıdurma baş verib.
Hakimiyyət Həmmudu Bəşşar Əsəd dövründə 25-ci diviziyanın xüsusi təyinatlı qüvvələrinə rəhbərlik etməkdə, həmçinin keçmiş rejim tərəfdarlarının silahlı qruplarının fəaliyyətində iştirak etməkdə ittiham edib.
Suriyanın hazırkı hakimiyyəti Əsəd rejiminin 2024-cü ilin dekabrında devrilməsindən sonra keçmiş rejim rəsmiləri və hərbçilərinə qarşı həbsləri davam etdirir. Həmmudun da ötən il Suriya sahil bölgəsində dövlət obyektlərinə və təhlükəsizlik qüvvələrinə qarşı silahlı hücumlarda iştirak etdiyi bildirilir.
