Səudiyyə Ərəbistanı Suriya ilə iqtisadi əlaqələri dərinləşdirmək məqsədilə Dəməşqdə yükdaşımaları və sərnişin daşınması da daxil olmaqla müraciətləri qəbul edən viza xidməti mərkəzinin açılışını həyata keçirib.Mərkəz iqtisadi əlaqələri gücləndirmək və ağır iqtisadi çətinliklər fonunda Suriyanın bərpasını dəstəkləmək istiqamətindəki birgə səylərin tərkib hissəsi kimi yaradılıb.
Açılış mərasimində Səudiyyə Ərəbistanının səfiri Fəhd bin Salim Əbu əs-Səneyn, Xarici İşlər Nazirliyinin nümayəndəsi və Səudiyyə Ərəbistanının Suriyadakı müvəqqəti işlər vəkili Abdullah əl-Həris iştirak ediblər.
Tədbirə həmçinin Suriyanın xarici işlər, turizm, vəqflər və sosial məsələlər nazirliklərinin rəsmiləri qatılıblar.
Mərkəzin fəaliyyətə başlaması Səudiyyə Ərəbistanının Suriyanın keçid hökumətini dəstəkləmək və iki ölkə arasındakı əməkdaşlığı genişləndirmək istiqamətindəki addımlarının bir hissəsidir.
1000 islahat və 1200 yeni qanun - Səudiyyənin biznes inqilabı və qlobal yüksəlişi necə başladı?
2024-cü ilin dekabrında Suriyanın uzunmüddətli prezidenti Bəşşar Əsədin devrilməsindən və keçid hökumətinin formalaşmasından bəri Ər-Riyad Suriyanın birliyini, suverenliyini və sabitliyini açıq şəkildə dəstəkləyir.
Səudiyyə Ərəbistanı həmçinin Suriyanın beynəlxalq maliyyə və ticarət bazarlarına çıxışını bərpa etmək üçün həyati əhəmiyyət kəsb edən ABŞ sanksiyalarının yumşaldılması istiqamətində diplomatik kanallardan istifadə edib.
Bundan əlavə, Səudiyyə Ərəbistanı və Qətər Suriyanın Dünya Bankına olan borclarını ödəmək üçün birgə 15 milyon dollar vəsait ayırıb və bununla da Dünya Bankının mümkün qrantları və inkişaf yardımları üçün yol açıblar.
2025-ci ilin iyulunda isə Səudiyyə Ərəbistanı Suriya üçün daşınmaz əmlak, telekommunikasiya və informasiya texnologiyaları layihələrini əhatə edən 6.4 milyard dollarlıq investisiya paketi elan etmişdi. Həmin sərmayə 14 illik müharibədən sonrakı yenidənqurma işləri ilə əlaqələndirilmişdi.
