Küveyt 2 ballistik raket və 13 pilotsuz uçuş aparatının məhv edildiyini açıqlayıb

Küveytdə İranın hücumları nəticəsində bir neçə elektrik ötürmə xətti zədələnib. Elektrik Nazirliyi qəlpələrin xətlərə zərər vurduğunu, lakin bunun elektrik təchizatında fasiləyə səbəb olmadığını bildirib. Nazirliyin məlumatına görə, qəza-bərpa qrupları artıq təmir işlərinə başlayıb. Küveyt Silahlı Qüvvələri isə ölkənin hava məkanında iki ballistik raket və 13 pilotsuz uçuş aparatının aşkar edildiyini açıqlayıb. Bildirilib ki, bütün hədəflər uğurla zərərsizləşdirilib. Hadisə nəticəsində ölən və ya yaralanan olmayıb. Rəsmi qurumlar vəziyyətin tam nəzarət altında olduğunu bəyan ediblər.