BAKI,AzerVoice, Nailə Babazadə
Türkiyənin xarici işlər naziri Hakan Fidan, Suriyanın bərpası və bölgədəki siyasi proseslərlə bağlı mühüm açıqlamalar verib. Onun sözlərinə görə, ölkənin tamamilə normallaşması, infrastrukturun yenilənməsi və əsas ehtiyacların qarşılanması üçün tələb olunan vəsait iki yüz on altı milyard dollar olaraq hesablanıb.
AzerVoice xəbər verir ki, SETA-da keçirilən “Suriya: Toparlanma və Yenidən İnşa” mövzusundakı tədbirdə çıxış edən Fidan, Suriyada uzun illər davam edən dağıntının miqyasının böyük olduğunu, rejimin müharibə dayandıqdan sonra ölkənin nə qədər çökdüyünü gördüyünü bildirib.
Nazir vurğulayıb ki, Suriya böhranının başlanğıcından etibarən Türkiyə zülmdən və müharibədən qaçan milyonlarla insan üçün sığınacaq olub. Onların Türkiyədə yerləşdirilməsi və şəraitinin təmin edilməsi misilsiz həmrəylik nümunəsi kimi qiymətləndirilib. Fidan deyib ki, siyasi tənqidlərə baxmayaraq, Türkiyə bu insani mövqedən geri addım atmayıb.
O, Suriyada rejimin xalqına qarşı həyata keçirdiyi zorakılıqları xatırladaraq, vəziyyətin Qəzzadakı durumla bənzər olduğunu qeyd edib. Onun sözlərinə görə, müharibə dayandıqdan sonra rejim infrastrukturun dağıldığını, iqtisadiyyatın çökdüyünü və əhalinin ölkəni tərk etdiyini daha açıq şəkildə görməyə başlayıb.
Fidan həmçinin Türkiyə, Rusiya və İranın təşəbbüsü ilə yaradılan Astana prosesinin bölgədə yeni köç dalğasının qarşısını alan əsas diplomatik mexanizm olduğunu bildirib. Nazir qeyd edib ki, Suriyada yeni siyasi mərhələ başlayıb və bölgə ölkələrinin bu yeni rəhbərlikdən ciddi gözləntiləri var.
O, Suriya üçün sabitliyin bərpasında bütün silahlı qrupların vahid ordu altında birləşməsinin həlledici əhəmiyyət daşıdığını deyib. YPG ilə bağlı danışan Fidan, heç bir ölkədə iki silahlı gücün mövcud ola bilməyəcəyini və bütün silahlı strukturların dövlət tabeliyinə keçməli olduğunu vurğulayıb.
İsrailin bölgədəki fəaliyyətlərinə toxunan Fidan, bu siyasətin Suriyada əlavə gərginlik yaratdığını bildirib və İsrailin təhlükəsizliyi başqalarının güvensizliyi üzərində qurmaq siyasətindən imtina etməli olduğunu qeyd edib.
Nazir sonda Türkiyənin Suriyanın yenidən xaosa sürüklənməsinə icazə verməyəcəyini və prosesə daha sistemli şəkildə davam edəcəyini bildirib.
