BAKI,AzerVoice

Avropa təhlükəsizlik sisteminin Türkiyəsiz yenidən formalaşması mümkün deyil.

AzerVoice xəbər verir ki, bunu Türkiyənin Xarici İşlər Naziri Hakan Fidan, Albaniyanın Avropa və Xarici İşlər Naziri İqli Hasani ilə görüşdən sonra keçirilən birgə mətbuat konfransında çıxışı zamanı deyib.

Fidan, ABŞ-dakı yeni administrasiyanın Ukrayna müharibəsi ilə bağlı baxışlarının və siyasətinin əvvəlki hökumətdən tamamilə fərqli olduğunu vurğulayaraq, "Ukraynaya edilən xərclərin geri qaytarılması üçün razılaşma zəmininin yaradılmağa çalışıldığını anlayırıq" - deyə bildirib.

O, Ukrayna Prezidenti Volodimir Zelenskinin fevralın 28-də ABŞ-ın paytaxtı Vaşinqtona səfər edəcəyini xatırladaraq, bu səfər zamanı müəyyən bir razılaşmanın həyata keçiriləcəyini düşündüyünü qeyd edib.

Fidanın sözlərinə görə, Ukraynalılar xüsusilə ABŞ-dan "atəşkəs və sülh müqaviləsi bağlanarsa, təhlükəsizlik zəmanəti adı altında müəyyən praktik, konkret, hərbi dəstək və zəmanət tələbləri" irəli sürürlər. O, bu tələblərin necə təmin ediləcəyinin və ABŞ-ın bunlardan hansına "bəli" deyəcəyinin hələlik məlum olmadığını bildirib.

Avropa Təhlükəsizlik Mexanizmi
Fidan, Avropa liderlərinin həm ABŞ ilə, həm də öz aralarında ciddi danışıqlar apardığını vurğulayaraq, Fransa Prezidenti Emmanuel Makronun da yaxın zamanda ABŞ-a səfər etdiyini xatırladıb.

O bildirib ki, 1-2 mart tarixlərində Avropa liderləri "Avropanın təhlükəsizliyi və Ukrayna" mövzusunda bir toplantıda bir araya gələ bilərlər.

"Bir tərəfdən Ukraynadakı müharibəni bitirməyə yönəlik addımlar atılır, digər tərəfdən isə Avropa ölkələrinin öz aralarında genişmiqyaslı məsləhətləşmə mexanizmi yaratmağa çalışdığını görürük. Avropa təhlükəsizlik sistemi gələcəkdə necə olacaq? NATO-suz Avropa təhlükəsizlik sistemi gündəmə gətirilərək müzakirə olunmağa başlanılıb. Əgər Avropa təhlükəsizlik sistemi yenidən qurulacaqsa, Türkiyənin bu sistemin xaricində qalması mümkün deyil. Türkiyəni və onun hərbi gücünü nəzərə almayan təhlükəsizlik modeli reallıqdan uzaq olacaq."- deyə Fidan əlavə edib.