Bakı,AzerVoice
Türkiyə insan hüquqları sahəsində beynəlxalq standartlara uyğunlaşmaq üçün genişmiqyaslı islahatlara başlayıb.
AzerVoice xəbər verir ki, Türkiyə İnsan Hüquqları və Bərabərlik Qurumunun (TİHEK) institusional strukturunun gücləndirilməsi və BMT prinsiplərinə tam uyğunlaşdırılması istiqamətində mühüm addımlar atılır.
Bu çərçivədə TİHEK-in hüquqi statusunun yenilənməsi, hesabatlarının effektivliyinin artırılması və müstəqilliyinin gücləndirilməsi üçün islahatlar həyata keçirilir. Paris Prinsiplərinə uyğunlaşma məqsədilə qurumun statusu təkmilləşdiriləcək və BMT İnsan Hüquqları Şurasında söz sahibi olması üçün səylər gücləndiriləcək.
Paris Prinsipləri milli insan hüquqları institutlarının müstəqilliyini, geniş səlahiyyətlərini və adekvat resurslara malik olmasını tələb edir. TİHEK bu prinsiplərə tam uyğunlaşmaq üçün strukturunu gücləndirəcək və “A” statusunda akkreditasiya almağa çalışacaq.
Bu proses çərçivəsində TİHEK-in funksionallığını artıracaq hüquqi tənzimləmələrin həyata keçirilməsi, hesabatların təsir gücünün artırılması və uzlaşma prosedurlarının yenidən təşkili nəzərdə tutulur.
TİHEK 2021-2023 İnsan Hüquqları Fəaliyyət Planı çərçivəsində ilk addımlarını atıb və 2022-ci ildə Milli İnsan Hüquqları Təşkilatlarının Qlobal Şəbəkəsinə (GANHRI) müraciət edərək “B” statusunda akkreditasiya alıb.
