BAKI, AzerVoice
Türkiyənin milli reaktiv təlim və yüngül hücum təyyarəsi HÜRJET-in beynəlxalq bazarlara çıxışı istiqamətində əhəmiyyətli razılaşma əldə olunub.
AzerVoice xəbər verir ki, İspaniyada
keçirilən 4-cü Beynəlxalq Müdafiə və Təhlükəsizlik Sərgisi
(FEINDEF) çərçivəsində TUSAŞ (TAI), Airbus və İspaniya Müdafiə
Nazirliyi arasında anlaşma memorandumu imzalanıb.
Razılaşma HÜRJET-in İspaniyaya satışı və bu ölkədə birgə istehsal
infrastrukturunun qurulmasını nəzərdə tutur.
TUSAŞ baş direktoru Mehmet Dəmiroğlu bu razılaşmanı “layihə üçün həlledici mərhələ” adlandıraraq bildirib ki, sənaye sahəsində əməkdaşlıq çərçivəsində hansı şirkətlərin hansı hissələri istehsal edəcəyi artıq müəyyənləşdirilib
"Türkiyədə yerləşdirmə işlərini artıq həyata keçirmişik. İndi bu təcrübəni İspaniyada tətbiq edəcəyik. Bu addım digər NATO və beynəlxalq bazarlara çıxışımız üçün yeni imkanlar yaradacaq." - deyə o bildirib.
Qeyd edək ki, bu, Türkiyədə istehsal edilən bir reaktiv təlim təyyarəsinin ilk dəfə NATO ölkəsinə satılması və həmin ölkədə istehsal potensialının yaradılması baxımından da bir ilkdir.
Dəmiroğlu HÜRJET-in yalnız NATO üçün deyil, digər ölkələr üçün də təlim və yüngül hücum məqsədilə istifadəyə yararlı bir platforma olduğunu vurğulayıb.
“Bu platforma güvəndiyimiz və gələcəkdə daha geniş yayılmasını istədiyimiz mühüm bir layihədir. Həm Türkiyə, həm də NATO üçün uyğun olan konfiqurasiyaları ilə diqqət çəkir.” - deyə o bildirib.
Dəmiroğlu həmçinin bildirib ki, belə razılaşmalar təkcə bir məhsulun deyil, bütövlükdə Türk müdafiə sənayesi ekosisteminin ixracına imkan yaradır.
“Bir platforma satdığınız zaman əslində onunla bağlı yüzlərlə şirkətin istehsal etdiyi məhsulu da bazara çıxarırsınız. Bu isə gələcəkdə KAAN, helikopter, İHA, suüstü və qurudakı sistemlərin ixracına da yol aça bilər.” - deyə o qeyd edib.
FEINDEF sərgisinin Türkiyənin ilk milli iştirakla qatıldığı beynəlxalq tədbir olduğunu qeyd edən Dəmiroğlu əlavə edib ki, sərgi çərçivəsində yeni tərəfdaşlarla əlaqələr qurulub və bu təmaslardan müsbət nəticələr gözlənilir.
Qeyd edək ki, HÜRJET TUSAŞ tərəfindən hazırlanan, yüksək manevr qabiliyyətinə və çoxsaylı missiya imkanlarına malik, tam yerli imkanlarla istehsal edilən bir platformadır.
