BAKI, AzerVoice

Meşə yanğınlarından 538 nəfər zərər çəkib, 2 nəfər həyatını itirib.

AzerVoice xəbər verir ki, Türkiyənin səhiyyə naziri Kamal Memişoğlu 1 iyun–4 iyul tarixləri arasında ölkə daxilində baş verən meşə yanğınlarında ümumilikdə 538 nəfərin xəsarət aldığını bildirib.

Nazir qeyd edib ki, hal-hazırda 1-i ağır olmaqla 3 xəstənin müalicəsi davam edir, 2 vətəndaş isə həyatını itirib.

Nazir Memişoğlu Giresun Qubernatorluğuna səfəri zamanı jurnalistlərə açıqlamasında bu faciəli hadisələrlə yanaşı, ölkədə sağlam qidalanma, artıq çəki və siqaret istifadəsi kimi problemlərə də toxunub. O, siqaretə qarşı genişmiqyaslı maarifləndirmə və mübarizə kampaniyasının başlandığını bildirib və bu prosesin yalnız cəza deyil, həm də mədəniyyət dəyişikliyi ilə aparılmalı olduğunu vurğulayıb.

Memişoğlu meşə yanğınlarının əksəriyyətinin insan faktorundan qaynaqlandığını xatırladaraq, “Əgər daha diqqətli olsaq, önləyici tədbirlərə vaxtında başlasaq, bu faciələrin qarşısını ala bilərik. Allah yanğın bölgələrində mübarizə aparan hər kəsin köməyi olsun” deyə bildirib.