BAKI, AzerVoice, Səməd Əyyubov
Dünya Müsəlman Alimlər Birliyi və Türkiyədəki İslam Alimləri Vəqfinin birgə təşkilatçılığı ilə keçirilən “İslami və İnsani Bir Məsuliyyət: Qəzza” konfransı Ayasofya məscidində başa çatıb.
AzerVoice xəbər verir ki, Demokratiya və Azadlıqlar Adasında 22–29 avqust tarixlərində müxtəlif mövzularda seminarlarla davam edən proqram, Ayasofya məscidində qılınan cümə namazı ilə yekunlaşıb. Tədbirdə 50 ölkədən 150 islam alimi iştirak edib.
Türkiyə Diyanət İşləri İdarəsinin sədri Ali Erbaş namazdan sonra məscidin qarşısında çıxış edərək bildirib ki, Qəzza üçün atılacaq addımları müzakirə etmək məqsədilə İstanbulda genişmiqyaslı konfrans təşkil olunub.
Erbaş xatırladıb ki, tədbir Eyüp Sultan məscidində qılınan cümə namazından sonra keçirilən mətbuat konfransı ilə başlayıb. O, İsrailin Qəzzada törətdiyi soyqırıma diqqət çəkərək bəzi dövlətlərin birbaşa və ya dolayı yolla İsrailə dəstək verdiyini vurğulayıb.
Ali Erbaş əlavə edib ki, fələstinlilərin mübarizəsini dəstəkləmək və soyqırımı dayandırmaq, dini, irqi, məzhəbi və mədəni kimliyindən asılı olmayaraq, hər bir insan üçün vicdan və əxlaq məsələsidir. Onun sözlərinə görə, İslam inancına görə zülmə və haqsızlığa biganə qalmaq, zalımlara səs çıxarmamaq birbaşa olaraq onlara şərik olmaq deməkdir və bu, haramdır.
Erbaş həmçinin milli və beynəlxalq səviyyədə İsrailə qarşı boykotun davam etdirilməsinin vacibliyini xüsusi vurğulayıb.
Daha sonra İslam Alimləri Vəqfinin rəhbəri, professor Nəsrullah Hacımüftüoğlu konfransın yekun bəyanatını oxuyub. O bildirib ki, Qəzzada davam edən qətliamlar, insanlığa qarşı ağır pozuntular, beynəlxalq ictimaiyyətin – xüsusən də ABŞ-ın susqunluğu və bəzi regional tərəflərin əməkdaşlığı fonunda “Böyük İsrail” layihəsinin reallaşdırılması cəhdləri səbəbindən İstanbulda bu konfrans təşkil olunub.
Hacımüftüoğlu vurğulayıb ki, konfrans Qəzzaya yardım və dəstək məqsədilə dini və insani məsuliyyətin icrası üçün keçirilib. Onun sözlərinə görə, konfrans çərçivəsində hücumların dərhal dayandırılması və humanitar yardım dəhlizlərinin açılması üçün genişmiqyaslı səfərbərlik çağırışı edilib. O, həmçinin soyqırım cinayətləri ilə mübarizə aparmaq və İsrailin işğalının qarşısını almaq üçün islami və insani bir ittifaqın yaradılmasının vacibliyini də diqqətə çatdırıb.
