BAKI, AzerVoice, Nailə Babazadə
Mehmet Fatih Kacır, nüvə texnologiyaları sahəsində innovasiyaların inkişafı üçün yeni texnopark layihəsinin həyata keçiriləcəyini açıqlayıb.
AzerVoice xəbər verir ki, Türkiyənin Sənaye və Texnologiya Naziri Mehmet Fatih Kacır, Türkiyənin ilk nüvə texnoparkını yaxın dövrdə qurmağı hədəflədiklərini bildirib. Açıqlama, İstanbulda keçirilən TEKNOFEST Aviasiya, Kosmos və Texnologiya Festivalı çərçivəsində Enerji və Təbii Sərvətlər Nazirliyinin təşkil etdiyi Nüvə Enerji Texnologiyaları Dizayn Müsabiqəsinin final mərasimində verilib.
Nazir Kacır, Türkiye Enerji, Nükleer ve Maden Araştırma Kurumunun (TENMAK) Küçükçekmece kampusunda keçirilən tədbirdə çıxış edərək, ölkənin inkişaf yolunda öz enerji ehtiyacını daxili imkanlarla qarşılaya bilən bir ölkə halına gəlməsinin vacibliyini vurğulayıb.
“Son 23 ildə enerji idxalına təxminən 1 trilyon dollar ödəmişik. İndi həm nüvə, həm də bərpa olunan enerji sahəsində atdığımız və atacağımız addımlar, Türkiyənin rifahlı gələcəyi üçün böyük əhəmiyyət daşıyır,” – deyə Kacır bildirdi.
Nazir, süni intellekt texnologiyalarının sürətlə inkişaf etdiyi dövrdə yüksək miqyaslı məlumat mərkəzlərinin fasiləsiz enerji ehtiyacını təmin etmək üçün nüvə enerjisinə dünya miqyasında yönəliş olduğunu bildirib.
Kacır, hazırda dünyada 31 ölkədə 416 nüvə reaktorunun fəaliyyətdə olduğunu xatırladaraq, Türkiyənin bu sahədə daha sürətli hərəkət edə bilməsinin arzuolunan olduğunu qeyd etdi. Prezident Rəcəb Tayyib Ərdoğanın liderliyində inşa edilən Akkuyu Nüvə Elektrik Stansiyasından sonra ikinci və üçüncü nüvə stansiyalarının da qurulacağını, eyni zamanda kiçik modulyar reaktorlarla nükleer enerjinin enerji xəritəsində əsas yer tutacağını vurğuladı.
Nazir Kacır, texnologiyanın yalnız müdafiə sahəsində deyil, bütün sahələrdə – nəqliyyat, enerji, maliyyə, kənd təsərrüfatı, ərzaq və səhiyyə daxil olmaqla – yerli və milli imkanlarla inkişaf etdirilməsinin zəruriliyini qeyd etdi.
Hazırda Türkiyədə 110 texnopark olduğunu bildirən Kacır, bu texnoparklarda nüvə və enerji sahəsində çalışan texnoloji startapların mövcud olduğunu və bu təşəbbüslərə dəstəyin davam edəcəyini söyləyib.
Kacır, TENMAK kampusunun bu istiqamətdə gələcəkdə qurulacaq yeni nəsil nüvə layihələri üçün əsas baza olacağına inandığını da əlavə etdi.
Tədbirdə Enerji və Təbii Sərvətlər Naziri Alparslan Bayraktar, TEKNOFEST İdarə Heyətinin sədri və T3 Vəqfi Mütevelli Heyətinin başçısı Selçuk Bayraktar və çox sayda tələbə iştirak edib.
