BAKI,AzerVoice, Fərid Mikayılov
Türkiyə Enerji və Təbii Sərvətlər naziri Alparslan Bayraktar, Türkiyənin milli enerji şirkəti BOTAŞ ilə BP arasında yeni qaz təchizatı müqaviləsinin imzalandığını açıqlayıb.
AzerVoice xəbər verir ki, bu barədə Bayraktar X sosial media hesabından paylaşım edib.
Nazirin verdiyi məlumata görə, 3 il müddətinə qüvvədə olacaq müqavilə çərçivəsində illik təxminən 1,6 milyard kubmetr, ümumilikdə isə 4,8 milyard kubmetr təbii qaz Türkiyəyə idxal ediləcək.
Bayraktar, anlaşmanın xüsusilə qış mövsümündə təchizat təhlükəsizliyinə mühüm dəstək verəcəyini vurğulayıb.
“Bu əməkdaşlıq enerji təhlükəsizliyimizin təminatı, mənbə müxtəlifliyinin artırılması və ticarət çevikliyinin gücləndirilməsi baxımından əhəmiyyətli bir addımdır. Anlaşmanın hər iki şirkət və ölkəmiz üçün xeyirli olmasını arzulayıram”
Müqavilə, Türkiyənin enerji mənbələrində şaxələndirmə strategiyasının bir parçası kimi qiymətləndirilir.
