BAKI,AzerVoice, Fərid Mikayılov
Türkiyənin Hərbi Hava Qüvvələrinin modernləşdirilməsini sürətləndirmək məqsədilə Qətərdən ikinci əl “Eurofighter Typhoon” döyüş təyyarələri almaq üçün danışıqlar apardığı bildirilir.
AzerVoice xəbər verir ki, məlumata görə, tərəflər arasında aparılan müzakirələr yekun mərhələyə daxil olub və sazişin yaxın zamanda nəticələnəcəyi gözlənilir.
Türkiyənin milli müdafiə naziri Yaşar Gülər və Hərbi Hava Qüvvələri komandanı, ordu generalı Ziya Cemal Kadıoğlu bu məqsədlə Dohada Qətər rəsmiləri ilə görüşlər keçiriblər.
Türkiyə hazırda sürətlə köhnələn F-16 donanmasını yeniləmək və 2030-cu illərin əvvəlində istifadəyə verilməsi planlaşdırılan yerli istehsal “KAAN” qırıcılarına qədər keçid dövrünü qarşılamaq niyyətindədir.
Bu məqsədlə Ankara iyul ayında Böyük Britaniya ilə 40 ədəd “Eurofighter Typhoon” alınması barədə ilkin razılaşma əldə etsə də, qiymət və təhvil şərtləri ilə bağlı qeyri-müəyyənliklər səbəbindən proses başa çatmayıb.
Bu çətinliyi aradan qaldırmaq üçün Türkiyənin Qətərin istifadəsində olan 24 ədəd “Tranche 3A” tipli “Eurofighter” təyyarələrini alması gündəmdədir. Regional mənbələrə görə, “Eurofighter” konsorsiumunu təşkil edən ölkələr (Böyük Britaniya, Almaniya, İtaliya, İspaniya və Fransa) bu satışa müsbət yanaşır.
Milli Müdafiə Nazirliyi 7 oktyabrda X platformasındakı paylaşımında nazir Yaşar Gülərin, Hərbi Hava Qüvvələri komandanı Kadıoğlu ilə birlikdə Dohada Qətərin baş nazir müavini və müdafiə naziri Şeyx Saud bin Abdurrahman bin Həsən bin Əli Al Sani ilə görüşdüyünü açıqlayıb.
Bəzi müdafiə sənayesi mütəxəssisləri isə ara mərhələ yatırımları əvəzinə mövcud F-16 donanmasının yerli texnologiyalarla modernləşdirilməsinin daha məqsədəuyğun olduğunu bildirirlər. “KAAN” layihəsinin ilk təhvilinin 2028-ci ilin sonuna planlaşdırıldığı açıqlansa da, ekspertlər bunun reallıqda 2030-cu ilə yaxın baş verəcəyini ehtimal edirlər.
