BAKI, AzerVoice, Fərid Mikayılov
Türkiyə Prezidenti Rəcəb Tayyib Ərdoğan Misirdən qayıdarkən jurnalistlərə verdiyi açıqlamada İsrailə xəbərdarlıq edib.
AzerVoice xəbər verir ki, Ərdoğan bildirib ki, İsrailin atəşkəs pozuntuları ilə bağlı təcrübəsi mənfidir, buna görə də Türkiyə və tərəfdaş ölkələr daha ehtiyatlı və prinsipial şəkildə hərəkət edir.
“Türkiyə, ABŞ və digər ölkələr atəşkəsin qorunması məsələsində qətiyyətlidir. İsrail yenidən soyqırıma qayıdarsa, bunun bədəlini çox ağır şəkildə ödəyəcəyini özü də yaxşı bilir” – deyə Ərdoğan vurğulayıb.
Ərdoğan, ABŞ Prezidenti Donald Trampın təşəbbüsü ilə Misirdə keçirilən beynəlxalq zirvənin, Yaxın Şərqdə sülh və sabitliyə aparan yeni bir dönüş nöqtəsi olduğunu bildirib.
O, HƏMAS ilə İsrail arasında əldə edilən razılaşmanın yalnız atəşkəs sənədi olduğunu, lakin bunun Fələstin məsələsinin tam həlli kimi qiymətləndirilməməli olduğunu diqqətə çatdırıb.
“Fələstin probleminin yeganə ədalətli həlli, 1967 sərhədləri daxilində, paytaxtı Şərqi Qüds olan, müstəqil və suveren Fələstin dövlətinin qurulmasıdır. Türkiyə bu istiqamətdə səylərini davam etdirəcək” – deyə Ərdoğan qeyd edib.
O əlavə edib ki, İsrail tərəfinin verilən öhdəliklərə sadiq qalması üçün beynəlxalq təzyiq vacibdir və ABŞ başda olmaqla təsir sahibi ölkələr bu istiqamətdə aktiv fəaliyyət göstərməlidir.
Ərdoğan Qəzzada yaranmış vəziyyətin humanitar fəlakət səviyyəsinə çatdığını vurğulayıb.
“Qəzza xalqı məcburi şəkildə köçürüldüyü yerlərə qayıdır, amma orada nə ev var, nə xəstəxana, nə də məktəb. Demək olar ki, ayaqda qalan bina yoxdur”- deyə o bildirib.
Türkiyə Prezidenti qeyd edib ki, ölkəsi Qəzzaya ən çox humanitar yardım göndərən dövlətlərdən biridir.
“Son günlərdə 350-ə yaxın yardım maşını Qəzzaya daxil olub. Razılaşmaya görə, hər gün ən azı 600 yardım maşınının bölgədən keçməsi planlaşdırılır” – deyə Türkiyə lideri vurğulayıb.
Ərdoğan, İslam Əməkdaşlıq Təşkilatı və Ərəb Liqasının yenidənqurma planlarının həyata keçirilməsi üçün maliyyə dəstəyinin vacibliyini vurğulayıb.
Türkiyə Prezidenti Böyük Britaniya və Fransanın Fələstin dövlətini tanımaq qərarlarını iki dövlətli həll prosesinə gedən yolun mühüm addımı kimi qiymətləndirib.
“Fransa Prezidenti Emmanuel Makron və Böyük Britaniyanın Baş naziri Keir Starmer ilə apardığımız danışıqlarda bu istiqamətdə razılaşma əldə etdik. Fələstin məsələsi uzun illərdən sonra ilk dəfə olaraq beynəlxalq ictimaiyyətin vicdan gündəminin mərkəzinə çevrilib”- deyə Ərdoğan qeyd edib.
Ərdoğan həmçinin Misirdə baş verən qəza nəticəsində həlak olan Qətər nümayəndə heyəti üzvlərinə başsağlığı verib və zirvənin bölgədə sülh və sabitlik üçün yeni ümidlər yaratdığına inandığını vurğulayıb.
