BAKI, AzerVoice, Nailə Babazadə
Türkiyə Prezidentliyi Müdafiə Sənayesi Komitəsinin sədri Haluk Görgün bildirib ki, Türkiyə artıq tank və zirehli texnika istehsalında dünyanın aparıcı mərkəzlərindən birinə çevrilib. Onun sözlərinə görə, 682 min kvadratmetrlik ərazidə inşa olunan yeni zavodda robotlaşdırılmış qaynaq sistemləri ilə ildə 96 “Altay” əsas döyüş tankı istehsal olunacaq.
AzerVoice xəbər verir ki, ALTAY Tankının Seriya İstehsal Zavodunun açılış mərasimində çıxış edən Görgün vurğulayıb ki, hər yeni istehsal müəssisəsi Türkiyənin müdafiə sənayesində tam müstəqilliyə atılmış möhür, hər yerli texnika isə xalqın iradə və əzm rəmzidir.
“Bu gün açılışını etdiyimiz müəssisə sadəcə ALTAY tankının istehsal xətti deyil, həm də Türkiyənin mühəndislik gücünün, texnoloji dərinliyinin və strateji baxışının simvoludur,” – deyə Görgün qeyd edib.
O, “yerli və milli istehsal” anlayışının artıq bir məqsəd deyil, gerçəklik və milli qürur mənbəyinə çevrildiyini bildirib.
“ALTAY layihəsi sadəcə bir hərbi platforma deyil, eyni zamanda müdafiə sənayemizin bacarıqlarını formalaşdıran bir məktəbdir. Öz tankını dizayn edib, sınaqdan keçirib, istehsala hazır vəziyyətə gətirən bir ölkə halına gəldik. Bu, milli ağlın və türk mühəndisinin nailiyyətidir.” - deyə Görgün qeyd edib.
Görgün, Prezident Rəcəb Tayyib Ərdoğanın “tam müstəqil müdafiə sənayesi” hədəfinin artıq bir vizyondan çıxaraq sistemli və institusional ekosistemə çevrildiyini vurğulayıb.
Onun sözlərinə görə, Türkiyə artıq müdafiə sənayesində əvvəllər xaricdən təmin edilən alt sistemləri özü istehsal edir və bu texnologiyaları dünya bazarına ixrac edə bilir. “ALTAY layihəsi sayəsində böyük kalibrli silahlar, kompozit zireh sistemləri və AKKOR Aktiv Müdafiə Sistemi kimi məhsullar Türkiyəni qlobal səviyyədə rəqabət aparan bir ölkə halına gətirib,” – deyə o əlavə edib.
Hazırda 800 mühəndis, min 250 işçi və 90 alt-podratçıdan ibarət nəhəng bir komanda tankın istehsalında iştirak edir. Görgün, “ALTAY” tankının 2 il zəmanətlə və 6 il logistik dəstəklə sahədə uzunömürlü xidmət göstərəcəyini qeyd edib.
Zavodun Zireh Sınaq Sahəsi, Ballistik Müdafiə Mərkəzi və Geniş Test Kompleksləri sayəsində Türkiyənin zirehli texnika sahəsində milli bacarığının daha da güclənəcəyini vurğulayıb.
“Bu zavod yalnız bu günün ehtiyaclarını deyil, gələcəyin tanklarını və zirehli vasitələrini formalaşdıracaq. Bu, Türkiyənin quru platformaları üzrə milli gücünün növbəti mərhələsidir.” - deyə Görgün qeyd edib.
“Bu zavod və bu tanklar sadəcə istehsal uğuru deyil, strateji ağlın, liderliyin və qətiyyətin nəticəsidir. Türkiyə artıq müdafiə sənayesində standart müəyyən edən, texnologiya paylaşan və qlobal rəqabətdə pay sahibi olan bir modelə çevrilib.”- deyə Görgün çıxışını yekunlaşdırıb.
