BAKI, AzerVoice, Nailə Babazadə
2026-cı ildə Türkiyə NATO Zirvəsi, Birləşmiş Millətlər Təşkilatı (BMT) İqlim Dəyişikliyi Çərçivə Konvensiyasının 31-ci Tərəflər Konfransı (COP31) və Türk Dövlətləri Təşkilatı (TDT) Zirvəsinə ev sahibliyi edəcək.
AzerVoice xəbər verir ki, son illərdə həm regionda, həm də qlobal diplomatiya arenasında fəal rol oynayan Türkiyə, xüsusilə Rusiya-Ukrayna müharibəsi başda olmaqla bir sıra problemli bölgələrdə vasitəçilik təşəbbüsləri, humanitar diplomatiya addımları və çoxtərəfli əməkdaşlıq mexanizmlərindən səmərəli istifadə edir.
Türkiyə diplomatik nüfuzunu beynəlxalq zirvələrə ev sahibliyi etməklə daha da gücləndirməyi planlaşdırır. 2026-cı ildə keçiriləcək əsas zirvələr bunlardır:
COP31 Zirvəsi: İstanbulda təşkil olunacaq, əsas konfrans tədbirləri isə Antalyada keçiriləcək. Türkiyə zirvə çərçivəsində gündəmi müəyyən edəcək və tədbirlərin icrasına məsul olacaq. Qeyd edək ki, COP30 Zirvəsi cari ilin noyabr ayında Braziliyada “yaşıl sənayeləşmə” mövzusunda keçirilmişdi.
NATO Zirvəsi: Zirvə iyul ayında Ankarada təşkil olunacaq. Son NATO Zirvəsi isə iyun ayında Hollandiya, Lahey şəhərində keçirilmiş, üzv ölkələrin müdafiə artırma hədəfləri müzakirə olunmuşdu.
Türk Dövlətləri Təşkilatı 13-cü Zirvəsi: Türkiyə, TDT-nin növbəti Dövlət Başçıları Zirvəsinə də ev sahibliyi edəcək. 12-ci Zirvə isə bu ilin oktyabr ayında Azərbaycanın Qəbələ şəhərində “Regional Sülh və Təhlükəsizlik” mövzusunda keçirilib.
Bu beynəlxalq zirvələr Türkiyənin qlobal diplomatiyada nüfuzunu gücləndirməsi və beynəlxalq arenada mühüm oyunçulardan biri kimi mövqeyini möhkəmləndirməsi baxımından böyük əhəmiyyət kəsb edir.
