BAKI, AzerVocie, Orxan Qədirzadə
Türkiyənin Kocaeli vilayətində terror təşkilatı İŞİD-ə qarşı aparılan istintaq çərçivəsində saxlanılan şübhəlilərlə bağlı məhkəmə qərarları açıqlanıb.
AzerVocie-un Türkiyə KİV-lərinə istinadən verdiyi məlumata görə, Kocaeli Polis İdarəsinin əməkdaşları tərəfindən keçirilən əməliyyat nəticəsində saxlanılaraq məhkəməyə çıxarılan 42 nəfərdən 18-i barəsində həbs qətimkan tədbiri seçilib.
Məhkəmə qərarı ilə 20 şübhəli barəsində isə ölkədən çıxarılma (deportasiya) qərarı verilib. Digər şəxslərlə bağlı hüquqi prosedurların davam etdiyi bildirilib.
Qeyd edək ki, əməliyyat terror təşkilatı İŞİD-in Türkiyə daxilində fəaliyyətinin qarşısının alınması və potensial təhlükəsizlik risklərinin aradan qaldırılması məqsədi daşıyıb. Təhlükəsizlik qurumları tərəfindən istintaq tədbirləri davam etdirilir.
