BAKI, VOA, Nailə Babazadə
Türkiyənin Daxili İşlər Nazirliyi 15 vilayətdə keçirilən eyni vaxtlı əməliyyatlar nəticəsində 15 ayrı mütəşəkkil cinayət qrupunun zərərsizləşdirildiyini açıqlayıb.
VOA xəbər verir ki, nazirliyin yaydığı məlumatda bildirilib ki, son bir həftə ərzində həyata keçirilən genişmiqyaslı əməliyyatlar çərçivəsində ümumilikdə 140 şübhəli saxlanılıb, onlardan 80-i həbs olunub.
Açıqlamaya əsasən, əməliyyatlar Respublika Baş Prokurorluqları ilə Mütəşəkkil Cinayətkarlıqla Mübarizə, Kibercinayətkarlıq və Narkotiklərlə Mübarizə qurumlarının koordinasiyası ilə həyata keçirilib. İl Jandarma komandanlıqları tərəfindən 15 vilayətdə aparılan əməliyyatlar zamanı şübhəlilərin hesablarında ümumilikdə 1 milyard 886 milyon lirə məbləğində maliyyə hərəkəti müəyyən edilib. Saxlanılan şəxslərdən 49-u barəsində məhkəmə nəzarəti tədbiri seçilib, digərləri ilə bağlı istintaq tədbirləri davam edir.
Araşdırmalar nəticəsində şübhəlilərin müxtəlif cinayət əməlləri törətdiyi müəyyənləşdirilib. Belə ki, Samsun və Ankarada internet üzərindən qanunsuz mərc oyunlarının təşkili və qeyri-qanuni pul köçürmələri, Kahramanmaraş və Afyonkarahisarda külli miqdarda dələduzluq və oğurluq, Balıkesir və Kırklarelidə miqrant qaçaqmalçılığı, Şırnakda silah qanunvericiliyinin pozulması halları aşkarlanıb. Gaziantep və Tekirdağ vilayətlərində sələmçilik fəaliyyəti, Konya, Sakarya, Manisa, Ağrı, Aydın və Düzcedə isə narkotik vasitələrin qanunsuz dövriyyəsinin təşkil edildiyi müəyyən olunub.
Əməliyyatlar zamanı çoxsaylı rəqəmsal materiallar, müxtəlif məbləğlərdə nağd pul, sənədlər və narkotik vasitələr götürülüb. Bundan əlavə, Maliyyə Cinayətlərinin Araşdırılması Şurasının apardığı yoxlamalar nəticəsində “Cinayət yolu ilə əldə edilmiş əmlakın leqallaşdırılması” maddəsi üzrə şübhəlilərə məxsus 4 daşınmaz əmlaka, 6 nəqliyyat vasitəsinə və 187 bank hesabına həbs qoyulub.
Daxili İşlər Nazirliyi mütəşəkkil cinayətkarlığa qarşı mübarizənin qətiyyətlə və fasiləsiz şəkildə davam etdiriləcəyini vurğulayıb.
