BAKI, VOA, Nailə Babazadə
Türkiyənin Vitse-prezidenti Cevdet Yılmaz Balıkəsirdə baş verən təyyarə qəzasında şəhid olan qəhrəman pilotun ailəsinə və türk millətinə səbir diləyib.
VOA xəbər verir ki, Cevdet Yılmaz özünün sosial media hesabında etdiyi paylaşımda Balıkəsirdəki 9-cu Əsas Şırnaq (Jet) Bazasında tapşırıq uçuşu yerinə yetirən F-16 qırıcısının qəzaya uğradığını bildirib. O, qəza nəticəsində şəhid olan hərbçiyə Allahdan rəhmət diləyərək hadisənin dərindən araşdırılacağını vurğulayıb.
Vitse-prezident qeyd edib ki, baş vermiş bu ağır hadisə həm məhkəmə, həm də inzibati qaydada ciddi şəkildə təhqiq olunacaq. Hazırda mütəxəssislər qəzanın hansı səbəbdən baş verdiyini müəyyənləşdirmək üçün araşdırmalara başlayıblar.
"Qəhrəman pilotumuza Allahdan rəhmət, ailəsi başda olmaqla millətimizə səbir və başsağlığı diləyirəm. Yaşanan bu acı hadisə bütün detalları ilə araşdırılacaq", - deyə Cevdet Yılmaz bildirib.
Qeyd edək ki, Türkiyənin Balıkesir vilayətində 9-cu Ana Reaktiv Baza Komandanlığının aviasiya parkına məxsus F-16 qırıcısı planlı uçuş zamanı qəzaya uğrayıb.
Hadisə gecə saat 00:50 radələrində baş verib. Məlumata görə, bazadan qalxan F-16 qırıcısı havaya qalxdıqdan qısa müddət sonra qəzaya düşüb. Təyyarə İstanbul–İzmir magistral yolunun Karesi istiqamətində yol kənarına çırpılıb. Zərbə nəticəsində təyyarənin hissələri ətrafa səpələnib.
Balıkesir valisi İsmayıl Ustaoğlu sosial şəbəkə hesabında açıqlamasında bildirib ki, qırıcı planlı tapşırıq uçuşu zamanı qəzaya uğrayıb və pilot həlak olub. Vali hadisənin gecə saat 00:50 radələrində baş verdiyini qeyd edərək, həlak olan pilotun ailəsinə və yaxınlarına başsağlığı verib.
Türkiyənin Milli Müdafiə Nazirliyi də hadisə ilə bağlı məlumat yayıb. Qeyd olunub ki, saat 00:56-dan etibarən F-16 ilə radioəlaqə və izləmə məlumatı kəsilib. Dərhal başladılan axtarış-xilasetmə tədbirləri nəticəsində təyyarənin qəzaya uğradığı müəyyənləşdirilib və qalıqlarına çatılıb. Nazirlik açıqlamasında pilotun həlak olduğu təsdiqlənib. Qəzanın səbəbi xüsusi istintaq komissiyasının aparacağı texniki araşdırmadan sonra müəyyən ediləcək.
Daxili İşlər Nazirliyi də hadisənin bütün istiqamətlər üzrə diqqətlə izlənildiyini, aidiyyəti qurumlarla koordinasiyalı şəkildə iş aparıldığını bəyan edib. Bildirilib ki, texniki araşdırmanın nəticələri qəzanın səbəblərinə aydınlıq gətirəcək.
Eyni zamanda Ədliyyə naziri Akın Gürek hadisə ilə bağlı başsağlığı mesajı yayıb. Məlumata əsasən, Balıkesir Respublika Prokurorluğu tərəfindən fakt üzrə istintaq başlanılıb, prokurorluq rəhbərliyi və iki prokuror hadisə yerinə ezam olunub.
Hadisədən sonra qəzaya uğrayan təyyarənin qalıqlarının ilk görüntüləri də ictimaiyyətə təqdim edilib. Şahidlər tərəfindən çəkilən kadrlarda təyyarənin parçalarının yol kənarında səpələndiyi müşahidə olunur.
