BAKI,VOA, Nailə Babazadə
Türkiyənin daxili işlər naziri Mustafa Çiftçi ABŞ, İsrail və İran arasındakı müharibə fonunda Türkiyə-İran sərhəd xəttində bütün zəruri tədbirlərin görüldüyünü açıqlayıb. Nazir bütün sərhəd-keçid məntəqələrinin nəzarət altında olduğunu və hazırda hər hansı bir problemin yaşanmadığını vurğulayıb.
VOA xəbər verir ki, nazir Çiftçi Təhlükəsizlik və Fövqəladə Hallar Koordinasiya Mərkəzində (GAMER) media nümayəndələrinin suallarını cavablandırarkən bildirib ki, müharibə başlayandan bəri sərhədyanı vilayətlərin valiləri ilə daimi təmasdadırlar. O, qeyd edib ki, Türkiyə vətəndaşları İran tərəfindən Türkiyəyə rahatlıqla keçə bilirlər və bu istiqamətdə heç bir məhdudiyyət yoxdur.
Bununla belə, nazir İranın öz vətəndaşlarının Türkiyə tərəfə keçməsinə məhdudiyyət qoyduğunu və üçüncü ölkə vətəndaşlarının keçidinə icazə vermədiyini bildirib. Nəticədə müharibənin əvvəli ilə müqayisədə İran vətəndaşlarının Türkiyəyə gəlişində təxminən üç-dörd dəfə azalma müşahidə olunur.
Mustafa Çiftçi Türkiyə tərəfinin həm Dövlət Miqrasiya Xidməti və AFAD, həm də Milli Müdafiə Nazirliyi vasitəsilə bölgəni və mümkün köç dalğası ehtimallarını yaxından izlədiyini, fiziki təhlükəsizlik şərtlərinin və geri göndərmə mərkəzlərinin hazırlıqlı olduğunu əlavə edib.
