BAKI,VOA, Nailə Babazadə
Türkiyə Daxili İşlər Nazirliyi ölkə daxilində terrorla mübarizə tədbirləri çərçivəsində İŞİD terror təşkilatına qarşı genişmiqyaslı əməliyyat keçirildiyini açıqlayıb. Türkiyə Daxili Qoşunların Baş Komandanlığının Terrorla Mübarizə İdarəsi və Respublika Baş Prokurorluqlarının koordinasiyası ilə 24 vilayətdə eyni vaxtda həyata keçirilən reydlər nəticəsində ümumilikdə 88 şübhəli şəxs saxlanılıb.
VOA xəbər verir ki, əməliyyatın coğrafiyası Ankara, İstanbul, İzmir, Antalya və Diyarbəkir də daxil olmaqla, ölkənin müxtəlif bölgələrini əhatə edib. Aparılan araşdırmalar zamanı müəyyən olunub ki, saxlanılan şəxslər terror təşkilatına üzv olmaqla yanaşı, təşkilata bilərəkdən yardım göstərib, qondarma xeyriyyə qurumları vasitəsilə maliyyə vəsaiti toplayıb və sosial media üzərindən terror təbliğatı aparıblar.
Nazirliyin məlumatına görə, əməliyyatlar zamanı şübhəlilərin ünvanlarından çox sayda təşkilati sənəd və rəqəmsal materiallar sübut kimi götürülüb. Hazırda saxlanılan şəxslərlə bağlı hüquqi prosedurlar davam etdirilir.
