BAKI,VOA, Orxan Qədirzadə

Türkiyənin ABŞ və İsrailin İrana qarşı başlatdığı hərbi əməliyyatların regional müharibəyə çevrilməsinin qarşısını almaq üçün göstərdiyi diplomatik səylər fonunda, Vaşinqtondakı bəzi qrupların Ankara əleyhinə fəaliyyətləri kəskinləşib.

VOA xəbər verir ki, mərkəzi Vaşinqtonda yerləşən "Demokratiyaların Müdafiəsi Fondu" (FDD) Türkiyənin regional sabitliyə xələl gətirdiyini iddia edən növbəti qərəzli hesabatını dərc edib.

Sözügedən hesabatda Türkiyənin NATO-dakı müttəfiqlik prioritetlərindən uzaqlaşdığı və bəzi dini strukturlardan siyasi məqsədlər üçün istifadə etdiyi iddia olunur. Lakin FDD-nin bu həmləsinə ABŞ-ın nüfuzlu siyasi dairələrindən sərt reaksiya gəlib. Donald Trampın birinci prezidentliyi dövründə Almaniyadakı səfiri və Milli Kəşfiyyat Direktorunun vəzifəsini icra edən Riçard Qrenell sosial media hesabından FDD-yə etiraz bildirib. Qrenell vurğulayıb ki, Türkiyə 1952-ci ildən NATO üzvüdür və "Türkiyə ittifaqdan ayrılarsa, NATO-nun mövcudluğu sona çatar".

FDD-nin maliyyə qaynaqları və fəaliyyət prinsipləri də ciddi müzakirə mövzusudur. 2001-ci ildə qurulan və əsasən İsrailin Şimali Amerikadakı imicini yaxşılaşdırmaq məqsədi daşıyan bu struktur, son illərdə Türkiyə əleyhinə lobbiçilik fəaliyyətlərini genişləndirib. Xüsusilə qurumun əməkdaşı Sinan Ciddinin yazdığı məqalələrdə Türkiyənin NATO-dan çıxarılması, F-35 qırıcılarının verilməməsi və hətta Türkiyə ilə İsrail arasında mümkün müharibə ssenariləri kimi təxribat xarakterli tezislər irəli sürülür. Bu fəaliyyətlərin ABŞ qərarvericiləri üzərində Türkiyəyə qarşı mənfi rəy yaratmaq məqsədi güddüyü bildirilir.