BAKI,VOA Orxan Qədirzadə
Türkiyənin Miqrasiya İdarəsi Sədrliyi tərəfindən 30 aprel 2026-cı il tarixinə olan qeyri-qanuni miqrasiya ilə bağlı yeni statistika açıqlanıb.
VOA xəbər verir ki, son illərdə ölkə ərazisində saxlanılan qeyri-qanuni miqrantların sayında və miqrant qaçaqçılığı hallarında əhəmiyyətli dərəcədə azalma müşahidə olunur.
Bu ilin ilk dörd ayında ölkə üzrə 45 min 230 nəfər saxlanılıb ki, onlardan sadəcə bir dəfə qeydiyyata alınanların sayı 43 min 378 nəfər təşkil edir.
Statistikaya nəzər saldıqda aydın olur ki, qeyri-qanuni miqrantların sayı 2019-cu ildə 454 min 662 nəfərlə ən yüksək səviyyəyə çatmışdı. Sonrakı illərdə dalğalanmalar olsa da, 2022-ci ildə 285 min 27 nəfər olan göstərici 2025-ci ilin sonuna 160 min 253 nəfərə qədər enib.
2026-cı ilin yanvar-aprel ayları üzrə aylıq göstəricilər isə aşağıdakı kimi paylanıb:
Yanvar - 11 min 916
Fevral - 10 min 649
Mart - 11 min 617
Aprel - 11 min 48
Saxlanılan miqrantların vətəndaşlıq mənsubiyyətinə görə ilk yerlərdə Əfqanıstan və Suriya vətəndaşları qərarlaşıb. İlk onluğun bölgüsü belədir:
Əfqanıstan – 13 min 543 nəfər
Suriya – 6 min 683 nəfər
Özbəkistan – 3 min 531 nəfər
Türkmənistan – 3 min 86 nəfər
İran – 2 min 922 nəfər
İraq – 1 min 695 nəfər
Fas – 1 min 142 nəfər
Misir – 1 min 83 nəfər
Əlcəzair – 762 nəfər
Pakistan – 711 nəfər
Qalan 10 min 72 nəfər isə digər ölkələrin vətəndaşlarının payına düşür.
Məlumatda həmçinin miqrant qaçaqçılığı ilə bağlı cinayət hadisələrinin statistikası da yer alıb. 2024-cü ildə 13 min 61 fakt qeydə alındığı halda, bu rəqəm 2025-ci ildə 11 min 588-ə düşüb. 2026-cı ilin aprel ayının sonuna olan məlumata əsasən isə 3 min 975 belə fakt qeydə alınıb.
