BAKI, VOA, Fərid Mikayılov
Türkiyənin xarici işlər naziri Hakan Fidan Ukraynaya səfərinin məhsuldar keçdiyini bildirib və Ukrayna Prezidenti Volodimir Zelenski tərəfindən təqdim olunan dövlət nişanına layiq görülməsindən qürur duyduğunu bəyan edib.
VOA xəbər verir ki, o qeyd edib ki, Türkiyə ilə Ukrayna arasında strateji tərəfdaşlığın daha da gücləndiyi bir dövrdə həyata keçirilən səfər ikitərəfli münasibətlərin inkişafı baxımından mühüm əhəmiyyət daşıyır.
Nazir göstərilən qonaqpərvərliyə görə, ilk növbədə Ukraynanın xarici işlər naziri Andrii Sybiha olmaqla bütün Ukrayna rəsmilərinə təşəkkür edib.
Fidan bildirib ki, səfər çərçivəsində Ukrayna Prezidenti Volodimir Zelenski, Prezident Aparatının rəhbəri və xarici işlər naziri Andrii Sybiha ilə keçirdiyi görüşlərdə Türkiyə–Ukrayna münasibətləri, eləcə də Rusiya–Ukrayna müharibəsindəki son vəziyyət ətraflı müzakirə olunub.
Nazirin sözlərinə görə, müharibə şəraitinə baxmayaraq, iki ölkə arasında əməkdaşlıq inkişaf etməkdə davam edir. O qeyd edib ki, Ukrayna parlamentinin səfərdən əvvəl təsdiqlədiyi Sərbəst Ticarət Sazişi iş adamları üçün yeni imkanlar yaradacaq və iqtisadi tərəfdaşlığı daha yüksək səviyyəyə qaldıracaq.
Hakan Fidan vurğulayıb ki, Türkiyə Ukraynanın müstəqilliyini, suverenliyini və ərazi bütövlüyünü dəstəkləməyə davam edir.
"Türkiyə olaraq tərəfləri yenidən danışıqlar masası arxasında bir araya gətirəcək və davamlı sülhə töhfə verəcək bütün təşəbbüsləri dəstəkləməyə hazırıq", – deyə nazir bildirib.
Səfər zamanı Hakan Fidan Krım tatarlarının milli lideri Mustafa Abdülcəmil Kırımoğlu və Krım Tatar Milli Məclisinin sədri Refat Çubarov ilə də görüşüb. Görüşdə Krım tatarlarının vəziyyəti müzakirə olunub və onların hüquqlarının qorunmasının Türkiyə üçün prioritet olduğu vurğulanıb.
Nazir paylaşımında Ukrayna Prezidenti Volodimir Zelenski tərəfindən təqdim edilən dövlət nişanını qəbul etməkdən qürur duyduğunu bildirərək, Ukrayna rəhbərliyinə təşəkkür edib.
Hakan Fidan əlavə edib ki, Türkiyə qarşılıqlı etimad və ortaq maraqlar əsasında Ukrayna ilə dostluq və strateji tərəfdaşlıq münasibətlərini inkişaf etdirməyə davam edəcək.
