BAKI,VOA Orxan Qədirzadə
Türkiyədə “Terrorsuz Türkiyə” prosesinin yeni mərhələsi ilə bağlı yol xəritəsinin müəyyənləşdirilməsi məqsədilə ölkənin 81 vilayətinin valisi, polis rəisləri və jandarma komandanlarının iştirakı ilə koordinasiya toplantısı keçiriləcək.
Toplantıya Türkiyə Böyük Millət Məclisinin (TBMM) sədri Numan Kurtulmuş və daxili işlər naziri Mustafa Çiftçinin də qatılacağı bildirilib.
Daxili İşlər Nazirliyinin açıqlamasına görə, toplantı avqustun 12-də saat 15:00-da Daxili İşlər Nazirliyinin GAMER toplantı salonunda keçiriləcək.
Nazir Mustafa Çiftçi toplantıdan əvvəl verdiyi açıqlamada prosesin uğursuzluğa düçar olmaması üçün hər kəsin üzərinə düşən vəzifəni yerinə yetirəcəyini bildirib.
Qanuni çərçivədən sahə mərhələsinə keçid
Nazirliyin açıqlamasında bildirilib ki, Prezident Rəcəb Tayyib Ərdoğan və Milliyyətçi Hərəkat Partiyasının (MHP) sədri Dövlət Baxçalı tərəfindən ortaya qoyulan siyasi xətt istiqamətində “Terrorsuz Türkiyə” prosesi qanuni çərçivəyə daxil edilib.
TBMM-də qəbul edilən və proseslə bağlı hüquqi addımları müəyyənləşdirən “Çərçivə Qanun”un ardınca əsas diqqət onun ölkə üzrə tətbiq mexanizmlərinin müəyyənləşdirilməsinə yönəldiləcək.
Bu məqsədlə 81 vilayətin valisi, polis və jandarma rəhbərlərinin iştirakı ilə genişmiqyaslı videokonfrans keçirilməsi planlaşdırılır.
Toplantının qanunverici hakimiyyəti təmsil edən TBMM ilə icra hakimiyyətinin yerli səviyyədəki nümayəndələrini vahid koordinasiya mexanizmində bir araya gətirməsi nəzərdə tutulur.
Vilayətlərdə yarana biləcək problemlər müzakirə olunacaq
Toplantıda prosesin bütün vilayətlərdə valilər tərəfindən operativ şəkildə izlənilməsi məsələsi müzakirə ediləcək.
Proses çərçivəsində sosial inteqrasiya, reabilitasiya və ictimai asayişin təmin olunması ilə bağlı atılacaq addımların koordinasiyası da gündəmdə olacaq.
Bundan başqa, valilər və hüquq-mühafizə orqanlarının prosesin icrası zamanı qarşılaşa biləcəyi mümkün problemlər müzakirə ediləcək.
Mümkün təxribatların, dezinformasiya kampaniyalarının və prosesi pozmağa çalışa biləcək qrupların fəaliyyətinin qarşısının alınması üçün yerli səviyyədə görüləcək tədbirlərin də nəzərdən keçiriləcəyi bildirilir.
Valilər əsas koordinasiya funksiyasını yerinə yetirəcək
Toplantıda 81 vilayətin yerli idarəetmə rəhbərlərinə və hüquq-mühafizə orqanlarına prosesin icrası ilə bağlı müvafiq göstərişlərin veriləcəyi gözlənilir.
Valilər öz vilayətlərində prosesin ən yüksək səviyyəli koordinatorları və mülki rəhbərləri kimi fəaliyyət göstərəcəklər. Onların dövlət qurumları arasında koordinasiyanın təmin edilməsinə və ictimaiyyətin proses barədə düzgün məlumatlandırılmasına nəzarət etməsi nəzərdə tutulur.
Şəhər mərkəzlərində polis, kənd və ucqar ərazilərdə isə jandarma qüvvələrinin ictimai asayişin və təhlükəsizliyin qorunmasına cavabdeh olacağı bildirilir.
Açıqlamada hüquq-mühafizə orqanlarının mümkün təxribatların qarşısının alınması ilə yanaşı, vətəndaşlarla etimad münasibətlərinin gücləndirilməsinə də diqqət yetirəcəyi vurğulanıb.
Nazirliyin məlumatına görə, keçiriləcək toplantı “Terrorsuz Türkiyə” prosesinin yeni mərhələsinin ölkə üzrə tətbiqinə dair əsas yol xəritəsini müəyyənləşdirəcək.
