BAKI,VOA, Fərid Mikayılov
ABŞ-də fəaliyyət göstərən 7 nüfuzlu Türk-Amerikan təşkilatı Birləşmiş Ştatlar Konqresinin 50-dən çox üzvünə birgə məktub ünvanlayaraq, Türkiyəyə F-35 qırıcı təyyarələrinin satışının dəstəklənməsini və CAATSA sanksiyalarının ləğv edilməsini tələb edib.
VOA xəbər verir ki, məktubda Türkiyənin təxminən 75 ildirdir NATO müttəfiqi olduğu və regionun təhlükəsizliyində strateji rol oynadığı vurğulanıb.
Sənədi Türk Amerikan Dərnəkləri Asambleyası, Türk Amerikan Koalisiyası, MÜSİAD USA və TASC kimi aparıcı qurumlar imzalayıb. Təşkilatlar bildiriblər ki, F-35 tədarükünün təsdiqlənməsi NATO-nun cənub-şərq cinahını gücləndirməklə yanaşı, Ankara-Vaşinqton münasibətlərinə böyük töhfə verəcək və Türkiyənin alternativ hərbi bazarlara yönəlməsinin qarşısını alacaq.
F-35 proqramına qayıdış məsələsi İyulun 7-də Ankarada keçirilən NATO Liderlər Zirvəsi çərçivəsində Türkiyə Prezidenti Rəcəb Tayyib Ərdoğan ilə ABŞ Prezidenti Donald Tramp arasındakı görüşdə də əsas müzakirə mövzularından biri olub.
Ərdoğan Türkiyə üçün istehsal olunmuş F-35A təyyarələrini xatırladaraq müsbət qərar gözlədiklərini bildirib. Donald Tramp isə Türkiyə ilə münasibətlərin çox yaxşı olduğunu vurğulayaraq deyib:
"F-35-lər ən yaxşı təyyarələrdir və bu, verməli olduğumuz bir qərardır. Niyə də olmasın? Biz dostlarımızın sanksiya altında olmasını istəmirik və Türkiyəyə tətbiq edilən ambarqoları ləğv edirik".Məlumat üçün bildirək ki, Türkiyə 2019-cu ildə Rusiyadan S-400 hava hücumundan müdafiə sistemləri tədarük etdikdən sonra F-35 proqramından çıxarılmışdı.
