BAKI,AzerVoice, Fərid Mikayılov
Türkmənistanın Nazirlər Kabineti sədrinin müavini, xarici işlər naziri Rəşid Meredov Əfqanıstanın iqtisadi məsələlər üzrə baş nazirinin müavini Molla Əbdül Qəni Bəradərlə Herat vilayətində görüş keçirib.
AzerVoice xəbər verir ki, görüşdə regional əhəmiyyətli enerji və infrastruktur layihələrinin icra vəziyyəti, xüsusilə Türkmənistan–Əfqanıstan–Pakistan–Hindistan (TAPI) qaz kəməri və Türkmənistan–Əfqanıstan–Pakistan (TOP) elektrik ötürücü xətti ətrafında geniş müzakirələr aparılıb.
Görüşdə Əfqanıstanın mədən və neft naziri Molla Hidayətullah Bədri, energetika və su ehtiyatları naziri Hacı Molla Məhəmməd Yunus Axundzadə, eləcə də hər iki ölkənin rəsmi nümayəndələri iştirak ediblər.
Əfqanıstan tərəfi bildirib ki, TAPI qaz kəmərinin reallaşdırılması region ölkələri arasında iqtisadi inteqrasiyanın güclənməsi baxımından strateji əhəmiyyət daşıyır. Molla Əbdül Qəni Bəradar Səudiyyə Ərəbistanının “Delta International Group” şirkətinin bu layihəyə sərmayə qoymağa ciddi maraq göstərdiyini açıqlayıb.
Onun sözlərinə görə, sözügedən şirkət:
- TAPI qaz kəməri vasitəsilə qaz alışı,
- Türkmənistanın iri qaz yataqlarının hasilat gücünün artırılması,
- Heratın Qozara rayonundan Qəndəharın Spin-Boldak bölgəsinə və oradan Hindistan sərhədinə qədər qaz kəmərinin çəkilməsi,
- Pakistanda Qvadar limanında müasir qaz mərkəzinin yaradılması layihələri ilə maraqlanır.
Meredov isə Əfqanıstan tərəfinin TAPI qaz kəməri layihəsi üçün təhlükəsiz və əlverişli şərait yaratdığını xüsusi vurğulayıb və bildirib ki, layihə üzrə işlər bu ilin sonuna qədər Herat şəhər mərkəzinə çatdırılacaq.
Türkmənistan XİN rəhbəri xarici şirkətlərin TAPI layihəsinə artan marağını müsbət qiymətləndirib, həmçinin Turğundi–Herat dəmir yolu layihəsinə sərmayə qoymağa hazır olduqlarını və Turğundi istiqamətində işlərin artıq başlandığını açıqlayıb.
Görüşdə tərəflər eyni zamanda ticarət əlaqələrinin genişləndirilməsi, bank sektoru üzrə əməkdaşlıq, yeni iş yerlərinin yaradılması və birgə iqtisadi layihələrin idarə olunması məsələlərini də müzakirə ediblər.
