BAKI,VOA, Fərid Mikayılov
Birləşmiş Ərəb Əmirlikləri (BƏƏ) Hörmüz boğazından keçən iki ADNOC gəmisinin İran tərəfindən hədəfə alınmasını sərt şəkildə pisləyib.
VOA xəbər verir ki, bu barədə BƏƏ Xarici İşlər Nazirliyinin yaydığı bəyanatda bildirilib. Məlumata görə, hücum nəticəsində xəsarət alan olmayıb.
BƏƏ Xarici İşlər Nazirliyi hücumun BMT Təhlükəsizlik Şurasının dəniz naviqasiyası azadlığının əhəmiyyətini təsdiqləyən və kommersiya gəmilərinin hədəfə alınmasını, eləcə də beynəlxalq dəniz marşrutlarının qarşısının alınmasını rədd edən 2817 saylı qətnaməsinin kobud şəkildə pozulması olduğunu bildirib.
Nazirlik kommersiya gəmilərinin hədəfə alınmasını və Hörmüz boğazından iqtisadi təzyiq və ya şantaj vasitəsi kimi istifadə edilməsini İran İslam İnqilabı Keşikçiləri Korpusunun quldurluq aktı kimi qiymətləndirib.
BƏƏ bunun regionun sabitliyinə, əhalinin təhlükəsizliyinə və qlobal enerji təhlükəsizliyinə birbaşa təhdid yaratdığını vurğulayıb.
Əbu-Dabi İranı bu cür hücumları dayandırmağa, hərbi əməliyyatların dərhal dayandırılmasına tam öhdəlik götürməyə və regional təhlükəsizliyin, qlobal iqtisadiyyatın və ticarətin sabitliyinin qorunması üçün Hörmüz boğazını tam və qeyd-şərtsiz açmağa çağırıb.
